ఈ వార్తను చదివే ముందు ఒక స్పష్టమైన హెచ్చరిక చేయదలిచాం. మనసును వికలం చేసే ఈ దారుణ హత్యోదంతం గురించి చదివేందుకు ఆసక్తి ఉంటే మాత్రమే ముందుకు వెళ్లండి. నిజానికి ఈ వార్తకు సంబంధించిన సమాచారం చాలానే ఉన్నప్పటికి.. తగినంత మాత్రమే ఇస్తున్న పరిస్థితి. ఎందుకంటే.. ఇంత క్రూరంగా.. అత్యంత భయానకంగా ఒకరిని చంపటం.. అది కూడా భర్త ఆ పని చేయటం ఈ మొత్తం ఉదంతంలో షాక్ కు గురి చేసే అంశం.
భర్తను భార్రయ.. భార్యను భర్త హత్యలు చేసుకోవటం ఈ మధ్యన ఎక్కువైన సంగతి తెలిసిందే. అయితే.. ఇలాంటి ఉదంతాలు మధ్యతరగతి.. ఎగువ మధ్యతరగతిలో చోటు చేసుకుంటూ ఉంటాయి. కానీ.. ఒక సెలబ్రిటీ విషయంలో చాలా అరుదుగా జరుగుతూ ఉంటుంది. ఈ వార్త వివరాల్లోకి వెళ్లే ముందు.. మరోసారి.. మనసును మెలి తిప్పేసి.. బాధకు గురి చేయటంతో పాటు.. కొందరికి వికారం కలిగించే వీలుంది. అందుకే.. మరోసారి ఆలోచించిన తర్వాత మాత్రమే దీన్ని చదివేందుకు ముందుకు వెళ్లండి. మాజీ మిస్ స్విట్జర్లాండ్ ఫైనలిస్టును ఆమె భర్త అత్యంత క్రూరంగా హత్య చేశాడు.
హత్య చేసిన అనంతరం ఆమె శరీరాన్ని ముక్కలు మక్కలు చేయటమే కాదు.. బ్లెండర్ (మిక్సీ)లో వేశాడు. ఈ దారుణ హత్యకు సంబంధించిన వివరాల్ని స్విస్ అధికారులు వెల్లడించారు. మాజీ మిస్ స్విట్జర్లాండ్ ఫైనలిస్టు క్రిస్టినా జోక్సిమోవిక్. 38 ఏళ్ల వయసున్న ఆమెకు భర్త.. ఇద్దరు పిల్లలు ఉన్నారు. స్విస్ దేశంలోని బాసెల్ నగరానికి సమీపంలోని బిన్నింగెన్ లోని తన ఇంట్లో ఆమె దారుణ హత్యకు గురయ్యారు. ఫిబ్రవరిలో జరిగిన ఈ దారుణం తాజాగా వెలుగు చూసింది. తాజాగా ఆమె భర్త.. 41 ఏళ్ల రాక్షసుడ్ని పోలీసులు అదుపులోకి తీసుకున్నారు. చేసిన రాక్షస కాండను అతను ఒప్పుకోవటంతో అతని బెయిల్ ను దేశ ఫెడరల్ కోర్టు రిజెక్టు చేసింది.
హత్య చేసిన వైనం గురించి తెలుసుకున్న పోలీసులు గగుర్పాటు గురవుతున్నారు. నిందితుడి మానసిక పరిస్థితి మీదా సందేహాలు వ్యక్తమవుతున్నాయి. అతడి మానసిక పరిస్థితి ఏ మాత్రం సరిగా లేదని విచారణ అధికారులు వ్యాఖ్యానిస్తున్నారు. తనను తాను కాపాడుకోవటం కోసమే హత్య చేసినట్లు చెబుతున్నా.. దానికి సంబంధించిన ఆధారాలు లభించలేదు. ఈ దారుణ హత్యకు సంబంధించిన నివేదిక ప్రకారం.. హత్య చేసి.. శరీర భాగాల్ని కత్తిరించి.. ఆ తర్వాత దాన్ని గ్రైండ్ చేసి.. రసాయన ద్రావణంలో కరిగించిన తీరు మనసుల్ని మెలి తిప్పేలా ఉందని చెప్పాలి.
హత్యకు గురైన బాధితురాలి విషయానికి వస్తే.. ఆమె మిస్ నార్త్ వెస్ట్ స్విట్జర్లాండ్ పోటీల్లో విజయం సాధించటమే కాదు.. 2007లో మిస్ స్విస్ టైటిల్ కోసం ఫైనలిస్టుగా నిలిచారు. ఈ హత్య గురించి తెలుసుకున్న బాధితురాలు స్నేహితురాలు తీవ్రమైన షాక్ కు గురయ్యారు. ‘‘తాను చాలా అందమైనది. ఆమె చాలా దయ కలిగిన మహిళ. ఇంత దారుణంగా హత్యకు గురి కావటాన్ని జీర్ణించుకోలేకపోతున్నా. ఇప్పుడు ఆమె ఇద్దరి పిల్లల గురించి ఆలోచిస్తున్నా’’ అని పేర్కొన్నారు. తాజాగా వెలుగు చూసిన ఈ దారుణ హత్య ఆ దేశంలో సంచలనంగా మారింది.
