మెగా-అల్లు వార్‌కు ఎండ్ కార్డ్‌.. వైర‌ల్ గా అల్లు అర్జున్ ట్వీట్!

మెగా-అల్లు వార్ కు తాజాగా ఐకాన్ స్టార్ అల్లు అర్జున్ ముగింపు ప‌లికిన‌ట్లే క‌నిపిస్తోంది. ఆంధ్రప్రదేశ్ ఉప ముఖ్యమంత్రి, పవర్ స్టార్ పవన్ కల్యాణ్ పుట్టిన‌రోజు నేడు. ఈ సంద‌ర్భంగా సినీ, రాజ‌కీయ ప్ర‌ముకులు, జ‌న‌సైనికులు, అభిమానులు ప‌వ‌న్ క‌ళ్యాణ్ కు సోష‌ల్ మీడియా ద్వారా బ‌ర్త్‌డే విషెస్ తెలుపుతున్నారు. ఈ క్ర‌మంలోనే ఓ పోస్టు మాత్రం అందరి దృష్టిని ఆకర్షిస్తోంది.

`ప‌వ‌ర్ స్టార్ & డిప్యూటీ సీఎం ప‌వ‌న్ క‌ళ్యాణ్ గారికి పుట్టిన‌రోజు శుభాకాంక్ష‌లు` అంటూ అల్లు అర్జున్ ట్వీట్ చేయ‌డం హైలెట్ గా మారింది. ఇందుకు కార‌ణం లేక‌పోలేదు.. ఏపీ ఎన్నిక‌ల స‌మ‌యంలో మెగా ఫ్యామిలీ మొత్తం ప‌వ‌న్ క‌ళ్యాణ్ కు మ‌ద్ధ‌తు ఇస్తే.. ఒక్క అల్లు అర్జున్ మాత్రం ఫ్రెండ్ష‌ప్ పేరుతో నంద్యాల వెళ్లి వైసీపీ అభ్యర్థి శిల్పా రవికి స‌పోర్ట్ చేయ‌డం వివాదం అయింది. శిల్పా రవి పిలవకపోయినా తానే వెళ్లి ప్రచారం చేశానని అల్లు అర్జున్ చెప్పడంతో ర‌చ్చ మొద‌లైంది.

మెగా, అల్లు కుటుంబాల మ‌ధ్య మ‌న‌స్ప‌ర్థ‌లు ఈ సంద‌ర్భంగా బ‌య‌ట‌ప‌డ్డాయి. నంద్యాల ఎపిసోడ్ తర్వాత మెగా ఫ్యాన్స్, జన సైనికులు అల్లు అర్జున్ ను టార్గెట్ చేశారు. సోష‌ల్ మీడియాలో ఆయ‌న్ను దారుణంగా ట్రోల్ చేస్తున్నారు. మ‌రోవైపు మెగా, అల్లు ఫ్యాన్స్ మ‌ధ్య ప‌చ్చ గ‌ట్టి వేస్తే భగ్గుమనే పరిస్థితి కనిపిస్తోంది. ఇక ఇటీవ‌ల జ‌న‌సేన ఎమ్మెల్యే బొలిశెట్టి శ్రీనివాస్, గన్నవరం నియోజకవర్గ ఇంఛార్జ్ చలమల శెట్టి రమేష్ బాబు వంటి నాయ‌కులు అల్లు అర్జున్ ను విమ‌ర్శిస్తూ మీడియా ముఖంగా ఘాటు వ్యాఖ్య‌లు చేశారు.

రోజురోజుకు అల్లు అర్జున్ పై నెగ‌టివిటీ పెరిగిపోతోంది. ఇలాంటి త‌రుణంలో అల్లు అర్జున్ చేసిన తాజా ట్వీట్ ప్రాధాన్యం సంతరించుకుంది. ప‌వ‌న్ క‌ళ్యాణ్ కు విషెస్ చెప్ప‌డం ద్వారా మెగా-అల్లు వార్‌కు బ‌న్నీ ఎండ్ కార్డు వేశాడ‌నే ప్ర‌చారం జ‌రుగుతోంది. మ‌రి ఇప్ప‌టికైనా మెగా ఫ్యాన్స్, జన సైనికులు కూల్ అవుతారో.. లేదో.. చూడాలి.

Many happy returns of the day to Power Star & DCM @PawanKalyan garu

— Allu Arjun (@alluarjun) September 2, 2024