ప్ర‌ముఖ సినీ న‌టుడు మోహన్ బాబు ఇంట భారీ చోరీ జ‌రిగింది. హైదరాబాద్ శివార్లలోని జల్ పల్లి లో ఉన్న మోహన్ బాబు ఇంట్లో పనిమనిషి నాయక్ అనే వ్యక్తి దొంగ‌తనానికి పాల్ప‌డ్డాడు. రూ.10 లక్షలతో పరార్ అయ్యాడు. ఇంట్లోని ఓ బీరువాలో వస్తువులు చిందర వందరగా పడి ఉండ‌డాన్ని గ‌మ‌నించిన కుటుంబ స‌భ్యులు వెంట‌నే మోహన్ బాబుకు తెలియ‌జేశారు.
ఇంట్లో పని చేస్తున్న నాయక్ క‌నిపించ‌డ‌క‌పోవ‌డం, అనుమానం వ‌చ్చి అత‌నికి ఫోన్ చేయ‌గా స్విచ్ ఆఫ్ రావడంతో అప్ర‌మ‌త్త‌మైన మోహన్ బాబు వెంట‌నే మంగ‌ళ‌వారం రాత్రి రాచకొండ సీపీకి ఫిర్యాదు చేశారు. కేసు న‌మోదు చేసిన పోలీసులు.. నాయక్ కోసం గాలింపు చ‌ర్య‌లు చేప‌ట్టారు. ఈ రోజు ఉద‌యం తిరుప‌తిలో అత‌న్ని అదుపులోకి తీసుకుని హైదరాబాద్ కు త‌ర‌లిస్తున్నారు.
కాగా, మోహన్ బాబు ప్ర‌స్తుతం `క‌న్న‌ప్ప` మూవీతో బిజీగా ఉన్న సంగ‌తి తెలిసిందే. మంచు విష్ణు టైటిల్ పాత్ర‌ను పోషిస్తుండ‌గా.. ఏవీఏ ఎంటర్‌టైన్‌మెంట్, 24 ఫ్రేమ్స్ ఫ్యాక్టరీ బ్యాన‌ర్ల‌పై అత్యంత భారీ బ‌డ్జెట్ తో మోహన్ బాబు స్వ‌యంగా ఈ సినిమాను నిర్మిస్తున్నారు. ముఖేశ్‌ కుమార్‌ సింగ్‌ దర్శకుడిగా వ్య‌వ‌హ‌రిస్తున్నాడు. టాలీవుడ్ నుంచి బాలీవుడ్ వ‌ర‌కు ఎంతో మంది స్టార్స్ క‌న్న‌ప్ప‌లో భాగం అవుతున్నారు. చిత్రీక‌ర‌ణ ద‌శ‌లో ఉన్న ఈ చిత్రం 2024 డిసెంబ‌ర్ లో విడుద‌ల అయ్యే అవ‌కాశాలు క‌నిపిస్తున్నాయి.
