మాస్ కా బాప్, నందమూరి నటసింహం బాలకృష్ణ హోస్ట్ గా వ్యవహరిస్తోన్న అన్ స్టాపబుల్ విత్ ఎన్బీకే సీజన్ 2 లాంచ్ కార్యక్రమం ఘనంగా జరిగిన సంగతి తెలిసిందే. ఈ సీజన్ కు సంబంధించిన ప్రోమోను లాంచ్ చేసిన షో నిర్వాహకులు…ఈ లాంచ్ కార్యక్రమాన్ని గ్రాండ్ గా నిర్వహించారు. బహుశా తొలిసారి ఓ ఓటీటీ షోకు ఈ రేంజ్ లో లాంచ్ ఈవెంట్ నిర్వహించారు. ఆ వేదికపై అన్‌స్టాపబుల్ సీజన్-2 టీజర్ ప్రోమోను బాలయ్య లాంచ్ చేశారు.
ఈ ఈవెంట్‌కు బాలయ్య అభిమానులు భారీ సంఖ్యలో తరలివచ్చారు. ఎప్పటిలాగే ఈ టీజర్‌లో బాలయ్య తనదైన స్టైల్‌, మ్యానరిజంతో అదరగొట్టేశారు. ఇండియానా జోన్స్ తరహాలో బాలయ్య.ఈసారి నెవర్ బిఫోర్ గెటప్ లో కౌబాయ్‌ కమ్ ట్రెజర్ హంటర్ గా కనిపించారు. ఒక చేతిలో హంటర్…మరో చేతిలో మ్యాప్ పట్టుకున్న బాలయ్య ఏదో నిధిని అన్వేషించేందుకు వెళ్తున్నట్లుగా ఈ ప్రోమో థీమ్ కనిపిస్తోంది. దారిలో అడ్డువచ్చిన పుర్రెలను తొక్కుకుంటూ బాలయ్య ముందుకు దూసుకుపోతున్నారు. ఇక ఎప్పటిలాగా టీజర్ చివర్లో ‘దెబ్బకు థింకింగ్‌ మారిపోవాలా’ అంటూ క్యాప్షన్ పెట్టారు నిర్వాహకులు.
మొదటి సీజన్ తో పోలిస్తే రెండో సీజన్ లో డబుల్ ఎంటర్‌టైన్‌మెంట్‌ను, ఫన్‌ను అందించేలా బాలయ్యతో షో దర్శకుడు ప్రశాంత్ వర్మ సందడి చేయించబోతున్నారట. ఇక, ఈ సీజన్ తొలి ఎపిసోడ్ గెస్ట్ గా తెలుగుదేశం పార్టీ అధినేత నారా చంద్రబాబు నాయుడు హాజరు కాబోవడం కన్ ఫర్మ్ అయింది. దీంతో, బావా బామ్మర్దుల మధ్య షో అదిరిపోతుందనడంలో ఎటువంటి సందేహం లేదు. ఈ సారి షోలో మెగాస్టార్‌ చిరంజీవి, పవర్‌స్టార్‌ పవన్ కల్యాణ్‌, దర్శకుడు త్రివిక్రమ్‌తో పాటు పలువురు సెలబ్రిటీలు ఈ సారి షోలో సందడి చేయనున్నట్లు తెలుస్తోంది. ప్రస్తుతం ఈ టీజర్ సోషల్ మీడియాలో వైరల్ అయింది.
