విశ్వవిఖ్యాత, నటసార్వభౌమ నందమూరి తారక రామారావు నటవారసుడిగా నటసింహం నందమూరి బాలకృష్ణ తన తండ్రి బాటలోనే ఇటు సినీరంగంలోనూ అటు రాజకీయ రంగంలోనూ రాణిస్తూ తండ్రికి తగ్గ తనయుడని ఖ్యాతి గడించారు. దాదాపు మూడు దశాబ్దాలుగా వెండితెరపై ఎన్నో వైవిద్యభరిత చిత్రాలతో ప్రేక్షకులను అలరిస్తున్న బాలయ్య…ఈ తరం హీరోలతోనూ పోటీపడి బ్లాక్ బస్టర్ హిట్ లతో బాక్సాఫీస్ ను షేక్ చేస్తున్నారు. అయితే, బాలయ్య బాబు నట, రాజకీయ వారసుడైన నందరమూరి మోక్షజ్ఞ తెరంగేట్రం ఎప్పుడెప్పుడా అని నందమూరి అభిమానులు ఆసక్తిగా ఎదురుచూస్తున్నారు.
ఈ నేపథ్యంలోనే బాలయ్య బాబు తన పుట్టినరోజు సందర్భంగా మోక్షజ్ఞ తెరంగేట్రంపై క్లారిటీ ఇచ్చారు. త్వరలోనే మోక్షజ్ఞ తొలిసినిమాలో నటించబోతున్నాడని చెప్పిన బాలయ్య…ఆ చిత్రానికి తానే దర్శకత్వం వహించబోతున్నానని చెప్పి షాకిచ్చారు. తనకు ఎంతో ఇష్టమైన, తాను హీరోగా నటించిన బ్లాక్ బస్టర్ చిత్రం ‘ఆదిత్య369’ సీక్వెల్ తో మోక్షజ్ఞను వెండితెరకు పరిచయం చేయబోతున్నట్టు బాలయ్య స్వయంగా ఓ తెలుగు న్యూస్ చానెల్ కు ఇచ్చిన ఇంటర్వ్యూలో వెల్లడించారు. ఇక, తన తనయుడి తెరంగేట్ర సినిమాలో తాను కూడా నటించబోతున్నానని చెప్పి బాలయ్య అభిమానులకు ట్రిపుల్ ధమాకా ఇచ్చారు. ఆ సినిమాకు తానే కథ రాసి దర్శకత్వం వహిస్తానని చెప్పారు బాలయ్యా.
బాలకృష్ణ ద్విపాత్రాభినయం చేసి ‘ఆదిత్య 369’ సినిమా టాలీవుడ్ చరిత్రలో ఓ మైలురాయి అని చెప్పవచ్చు. సింగీతం శ్రీనివాసరావు దర్శకత్వంలో 90వ దశకంలో వచ్చిన ఈ సైన్స్ ఫిక్షన్ కమ్ పౌరాణిక చిత్రం టాలీవుడ్‌లో సంచలనం సృష్టించింది. టైమ్ మెషీన్ కథాంశంతో వచ్చిన ఈ తెలుగు సినిమాను అన్ని వర్గాల ప్రేక్షకులు ఆదరించారు. ఇక, ఈ చిత్ర సీక్వెల్ కు బాలయ్య కథ అందించడమే కాకుండా దర్శకత్వం కూడా వహిస్తానని చెప్పడం, మోక్షజ్ఞ తెరంగేట్రం చేయబోతుండడంతో నందమూరి అభిమానులకు బాలయ్య బాబు ట్రిపుల్ ధమాకా ఇచ్చినట్టయింది.
