టీడీపీ ఎంపీ గల్లా జయదేవ్ వైఖరి ఏమిటో? విచిత్రంగా ఉందనే అభిప్రాయాలు వ్యక్తమవుతున్నాయి. టీడీపీ జాతీయ ప్రధాన కార్యదర్శి లోకేష్ యువ గళం పాదయాత్ర తన జిల్లాలోకి వచ్చినా గల్లా ఎక్కడా కనిపించలేదు. పాదయాత్రకు దూరంగానే ఉన్నారు. తాజాగా లోకేష్కు సంబంధించి ఓ ట్వీట్ చేశారు. కానీ ఇందులో మాత్రం అసలు విషయం చెప్పలేదనే అభిప్రాయాలు వ్యక్తమవుతున్నాయి.
అర్ధరాత్రి పాదయాత్రలేంటీ? మతిపోయిందా? లోకేష్ పాదయాత్రతో ఒరిగిందేమీ లేదు. నారా లోకేష్ను ఏపీ ప్రజలు నమ్మడం లేదు. ఎన్ని కిలోమీటర్లు నడిచినా ప్రయోజనం శూన్యం, అందుకే పాదయాత్రకు వెళ్లలేదు. టీడీపీ హైకమాండ్ ఇకనైనా పునరాలోచన లేయాలి.. అని ఎంపీ గల్లా జయదేవ్ అన్నారని రెండు వార్తలు సామాజిక మాధ్యమాల్లో వైరల్ అయ్యాయి. దీనిపై స్పందించిన గల్లా.. ఈ వార్తల్లో ఏ మాత్రం నిజం లేదని, కొంతమంది స్వార్థ ప్రయోజనం కోసం ఈ ప్రచారం చేస్తున్నారని ట్విటర్లో పోస్టు చేశారు. తాను లోకేష్ పాదయాత్రకు వ్యతిరేకంగా ఎలాంటి కామెంట్లు చేయలేదని చెప్పారు.
గల్లా జయదేవ్ స్పందించడం బాగానే ఉంది కానీ పాదయాత్రకు ఎందుకు రాలేదనే విషయాన్ని మాత్రం ఆయన చెప్పలేదనే వ్యాఖ్యలు వినిపిస్తున్నాయి. ఆయనతో పాటు మరో ఎంపీ కేశినేని నాని కూడా లోకేష్ పాదయాత్రను ఏ మాత్రం పట్టించుకోవడం లేదనే అభిప్రాయాలు వ్యక్తమవుతున్నాయి. మరి దీనిపై వివరణ ఇవ్వని జయదేవ్.. లోకేష్ను ఏమనలేదని మాత్రం స్పందిచారు. ఓ వైపు కేశినేని నాని పార్టీపై అసంతృప్తితోనే పాదయాత్రకు రాలేదని సమాచారం. మరి జయదేవ్ ఎందుకు రాలేదంటే మాత్రం జవాబు రావడం లేదని టాక్.
