టాలీవుడ్ స్టార్ హీరో, జనసేన అధినేత పవన్ కళ్యాణ్ జన్మదిన సందర్భంగా జనసేన కార్యకర్తలు, ఆయన అభిమానులు పండగ చేసుకుంటున్న సంగతి తెలిసిందే. జనసేనకు ఒకరోజు జీతం విరాళం కార్యక్రమాన్ని విజయవంతం చేసేందుకు జనసైనికులంతా కృషి చేస్తున్నారు. ఇక, పవన్ అభిమానులు బర్త్ డే సందర్భంగా భారీ కేకులు కట్ చేసి అన్నదానం, రక్తదానం వంటి కార్యక్రమాలు చేపడుతున్నారు. ఈ నేపథ్యంలోనే పవన్ కళ్యాణ్ కు పలువురు రాజకీయ, సినీ ప్రముఖులు జన్మదిన శుభాకాంక్షలు తెలియజేస్తున్నారు.
ఈ క్రమంలోనే పవన్ కు టీడీపీ అధినేత నారా చంద్రబాబునాయుడుతో పాటు టిడిపి జాతీయ ప్రధాన కార్యదర్శి నారా లోకేష్ పుట్టినరోజు శుభాకాంక్షలు తెలియజేశారు. పవన్ కు హార్దిక జన్మదిన శుభాకాంక్షలు తెలిపిన చంద్రబాబు ఆయన నిండు నూరేళ్లు ఆరోగ్యంగా ఉండాలని ఆకాంక్షించారు. ప్రజల మనిషిగా, సమాజ శ్రేయోభిలాషిగా రాష్ట్ర జనహితాన్ని కోరుకునే పవన్ ఆరోగ్య, ఐశ్వర్యాలతో వర్ధిల్లాలని చంద్రబాబు కోరుకున్నారు. ఇక, సమాజం పట్ల బాధ్యతతో ప్రజల పక్షాన నిలిచి పోరాడుతున్న రియల్ హీరో పవన్ కు లోకేష్ కూడా జన్మదిన శుభాకాంక్షలు తెలిపారు.
పవన్ ఆయురారోగ్యాలతో నిండు నూరేళ్లు వర్ధిల్లాలని లోకేష్ ఆకాంక్షించారు. ఇక, పవన్ కళ్యాణ్ బర్త్ డే సందర్భంగా పవన్ నటిస్తున్న ఓజీ చిత్రం నుంచి క్రేజీ గ్లింప్స్ రిలీజ్ అయింది. ముంబైలో అండర్ వరల్డ్ డాన్ పాత్రలో నటించిన పవన్ శత్రువులను ఊచకోత కోస్తున్న టీజర్ వీడియో ప్రస్తుతం సోషల్ మీడియాలో ట్రెండ్ అవుతోంది. ఇక, పవన్ బర్త్ డే సందర్భంగా హరిహర వీరమల్లు నుంచి కూడా సరికొత్త పోస్టర్ విడుదలైంది. దీంతో, పవన్ ఫ్యాన్స్ అంతా ఫుల్ జోష్ లో ఉన్నారు. ఆ గ్లింప్స్ కు రికార్డు వ్యూస్ వచ్చేలా పవన్ ఫ్యాన్స్ ట్రెండ్ చేస్తున్నారు.
