మెగాస్టార్ చిరంజీవి, బింబిసార ఫేమ్ మల్లిడి వశిష్ట కాంబినేష‌న్ లో ప్ర‌స్తుతం `విశ్వంభ‌ర` అనే సోసియో-ఫాంటసీ చిత్రం తెర‌కెక్కుతున్న సంగ‌తి తెలిసిందే. భారీ బ‌డ్జెట్ తో అత్యంత ప్ర‌తిష్టాత్మ‌కంగా యూవి క్రియేషన్స్ వారు ఈ సినిమాను నిర్మిస్తున్నారు. చెన్నై సోయ‌గం త్రిష ఇందులో హీరోయిన్ గా న‌టిస్తుండ‌గా.. ఎం. ఎం. కీరవాణి సంగీతాన్ని అందిస్తున్నారు. అయితే ద‌స‌రా పండుగ కానుక‌గా విశ్వంభ‌ర టీజర్ ను మేక‌ర్స్ తాజాగా విడుద‌ల చేశారు.
`విశ్వాన్ని అలుముకున్న ఈ చీకటి.. విస్తరిస్తున్నంత మాత్రానా వెలుగు రాదని కాదు, ప్రశ్నలు పుట్టించిన కాలమే సమాధానాన్ని కూడా సృష్టిస్తుంది. విర్రవీగుతున్న ఈ అరాచకానికి ముగింపు పలికే మహాయుద్ధాన్ని తీసుకొస్తుంది` అంటూ గంభీర‌మైన బ్యాక్‌గ్రౌండ్ వాయిస్ తో ప్రారంభ‌మైన టీజర్ ఆధ్యంతం ఆక‌ట్టుకుంది. ఊహించని విజువల్స్ తో డైరెక్ట‌ర్ వశిష్ట మరో లోకం లోకి తీసుకెళ్లాడు.
శ్వేత వర్ణపు ఎగిరే అశ్వం మీద చిరంజీవి ఎంట్రీ అదుర్స్ అనే చెప్పాలి. పవర్‌ఫుల్‌ డైలాగ్స్‌, గ్రాండ్‌ విజువల్స్, గ్రాఫిక్స్‌, చిరంజీవి మాస్ అవ‌తార్‌, యాక్షన్ సీక్వెన్స్, బ్యాక్‌గ్రౌండ్ మ్యూజిక్ టీజర్ లో మెయిన్ హైలెట్స్ గా నిలిచాయి. ప్రపంచాన్ని నాశ‌నం చేసేందుకు దుష్టశక్తి రావడం, ఆ దుష్టశక్తి ని అంతం చేసి వెలుగులు పంచేందుకు మానవాతీత శక్తి రావడం అనే కాన్సెప్ట్తో విశ్వంభ‌ర రాబోతోంది.
మొత్తానికి ఆద్యంతం ఆస‌క్తిక‌రంగా సాగిన టీజర్.. సినిమాపై భారీ అంచ‌నాలు ఏర్ప‌డేలా చేసింది. కాగా, విశ్వంభ‌ర చిత్రాన్ని 2025 సంక్రాంతికి రిలీజ్ చేయాల‌ని నిర్మాత‌లు మొద‌ట భావించారు. కానీ ఇంత‌లోనే రామ్ చరణ్ న‌టించిన గేమ్ ఛేంజ‌ర్ సంక్రాంతి బ‌రిలోకి దిగుతుండ‌టంతో.. త‌న‌యుడి కోసం చిరంజీవి వెన‌క్కి త‌గ్గుతున్నారు. ఇక అన్నీ కుదిరితే వ‌చ్చే ఏడాది వేస‌వికి విశ్వంభ‌ర థియేట‌ర్స్ లో సంద‌డి చేయ‌నుంద‌ని స‌మాచారం.
