2024 సంక్రాంతి సినిమాల విషయంలో ఎప్ప‌టిక‌ప్పుడు కొత్త ట్విస్టులు చూస్తున్నాం. ముందు అనుకున్న సినిమాలు ఒక్కొక్క‌టిగా రేసు నుంచి త‌ప్పుకుంటున్నాయి. కొత్త‌వి తెర‌పైకి వ‌స్తున్నాయి. ఆల్రెడీ ప్ర‌భాస్ సినిమా ప్రాజెక్ట్-కే పండుగ రేసు నుంచి త‌ప్పించారు. ఇంకా అధికారిక ప్ర‌క‌ట‌న రాలేదు కానీ.. వాయిదా అనివార్యం అని తెలుస్తోంది. ఇక రామ్ చరణ్ సినిమా గేమ్ ఛేంజ‌ర్ ఎప్పుడో త‌ప్పుకుంది. దాని స్థానంలో శంక‌రే డైరెక్ట్ చేస్తున్న ఇండియ‌న్-2 వ‌స్తుంద‌ని అన్నారు. కానీ ఆ చిత్రం వేస‌వికి వాయిదా ప‌డింద‌న్న‌ది తాజా స‌మాచారం.
ప్రాజెక్ట్-కే త‌ప్పుకున్న‌ట్లు స‌మాచారం రాగానే ర‌వితేజ సినిమా ఈగ‌ల్‌ను సంక్రాంతి రేసులో నిల‌బెట్టారు. ఇప్పుడు ఇండియ‌న్-2 సంగ‌తి తేలిపోవ‌డంతో ఇంకో కొత్త సినిమా రేసులోకి రానున్న‌ట్లు స‌మాచారం. అదే.. హ‌నుమాన్. అ, జాంబిరెడ్డి చిత్రాల ద‌ర్శ‌కుడు ప్ర‌శాంత్ వ‌ర్మ ద‌ర్శ‌క‌త్వంలో తేజ స‌జ్జా హీరోగా తెర‌కెక్కుతున్న సూప‌ర్ హీరో ఫిలిం హ‌నుమాన్‌ను ఈ వేస‌విలోనే రిలీజ్ చేయాల‌నుకున్నారు. కానీ షూటింగ్ పూర్త‌యిన‌ప్ప‌టికీ.. పోస్ట్ ప్రొడ‌క్ష‌న్‌కు చాలా టైం ప‌డుతుండ‌టంతో సినిమా వాయిదాల మీద వాయిదాలు ప‌డుతోంది.
ప్ర‌పంచ స్థాయి ప్ర‌మాణాల‌తో బాగా ఖ‌ర్చు పెట్టి వీఎఫెక్స్ చేస్తున్న టీం రిజ‌ల్ట్ మీద చాలా న‌మ్మ‌కంగా ఉంది. ఈ చిత్రం పాన్ ఇండియా స్థాయిలో సంచ‌ల‌నం రేప‌గ‌ల‌ద‌ని న‌మ్ముతున్నారు. అందుకే మంచి టైమింగ్ చూసి రిలీజ్ చేయాల‌నుకుంటున్నారు. ఎలాగూ సంక్రాంతికి ఖాళీ క‌నిపిస్తుండ‌టంతో అప్పుడే ఈ సినిమాను రిలీజ్ చేయాల‌ని ఫిక్స‌య్యార‌ట. ఈమేర‌కు అధికారిక ప్ర‌క‌ట‌న కూడా రాబోతున్న‌ట్లు తెలిసింది. మ‌రి పెద్ద సినిమాల పోటీని హ‌నుమాన్ ఏమేర త‌ట్టుకుని నిల‌బ‌డుతుందో చూడాలి.
