రామ్ చరణ్-శంకర్-దిల్ రాజు.. ఈ క్రేజీ కాంబినేషన్లో తెరకెక్కుతున్న ‘గేమ్ చేంజర్’ మూవీ ఎప్పుడు రిలీజవుతుందనే విషయంలో ఎంతకీ సస్పెన్స్ తీరట్లేదు. స్వయంగా నిర్మాత చెబుతున్న మాటలు కూడా నీటి మీద రాతలవుతున్నాయి. ఈ ఏడాది ఆరంభంలో సెప్టెంబర్ రిలీజ్ అని ప్రకటించారు దిల్ రాజు. కానీ అది సాధ్య పడలేదు. తర్వాత క్రిస్మస్ రిలీజ్ అన్నారు. ఇది మాత్రం పక్కా అనే నమ్మకంతో అభిమానులు క్రిస్మస్ సంబరాలకు రెడీ అయిపోయారు. ఇటీవల సంగీత దర్శకుడు తమన్ కూడా డిసెంబరు 20న ఈ చిత్రం విడుదల కానుందనే సంకేతాలే ఇచ్చాడు. అతనా మాట అన్నాడంటే.. ఖాయమైనట్లే అని, రిలీజ్ డేట్ గురించి అప్డేట్ కూడా వచ్చేస్తుందని అభిమానులు ఆశించారు. కానీ తీరా చూస్తే సెకండ్ సింగిల్ రిలీజ్ విషయాన్ని ప్రకటించిన పోస్టర్లో రిలీజ్ డేట్ లేదు. దీంతో మళ్లీ సందేహాలు మొదలయ్యాయి.
ఇప్పుడేమో సోషల్ మీడియాలో ‘గేమ్ చేంజర్’ గురించి కొత్త మొదలైంది. ఈ చిత్రం క్రిస్మస్ రేసు నుంచి తప్పుకుందని.. సంక్రాంతికి వస్తుందని ఊహాగానాలు నడుస్తున్నాయి. సంక్రాంతికి చిరంజీవి సినిమా ‘విశ్వంభర’ వస్తుంటే.. ఆయన తనయుడి సినిమాను ఎలా రిలీజ్ చేస్తారు అనే ప్రశ్న తలెత్తడం సహజం. అయితే ‘విశ్వంభర’ సంక్రాంతికి రాకపోవచ్చనే అనుమానాలు వ్యక్తమవుతున్నాయి.
ఆ సినిమా షూట్ పూర్తి కావచ్చినా భారీగా విజువల్ ఎఫెక్ట్స్‌తో ముడిపడ్డ సినిమాకు పోస్ట్ ప్రొడక్షన్ కార్యక్రమాలు ఆలస్యమయ్యేలా ఉన్నాయని.. కాబట్టి సంక్రాంతి రిలీజ్ విషయంలో గ్యారెంటీ లేదని అంటున్నారు. విశ్వంభర టీం మరి కొన్ని రోజుల్లో ఏ విషయం క్లారిటీ ఇస్తుందని.. వాళ్లు సంక్రాంతికి రాని పక్షంలో ‘గేమ్ చేంజర్’ను ఆ టైంలో రిలీజ్ చేసేస్తారని.. అందుకే ఇప్పుడు పోస్టర్ మీద రిలీజ్ డేట్ ప్రకటించలేదని అంటున్నారు. మరి కొన్ని రోజుల్లో ఏ విషయం స్పష్టత రావచ్చు.
