సంచలనం అంతకు మించిన కన్ఫ్యూజన్ తో బయటకు వచ్చిన గాంధీ ఆసుపత్రిలో గ్యాంగ్ రేప్ ఉదంతం షాకింగ్ ట్విస్టు చోటు చేసుకుంది. తొలుత గ్యాంగ్ రేప్ జరిగినట్లుగా భావించినా.. పోలీసుల విచారణలో కొత్త సందేహాలు తలెత్తటం.. ఆ దిశగా పోలీసులు చేసిన విచారణ ఇప్పుడు కొలిక్కి వచ్చిందని చెప్పాలి. తన సోదరి భర్తకు ఆరోగ్యం సరిగా లేకపోవటంతో గాంధీ ఆసుపత్రికి చికిత్స కోసం రావటం.. ఆ సందర్భంగా తనపై గ్యాంగ్ రేప్ జరిగందని బాధితురాలు ఆరోపించటం తెలిసిందే. తనతో పాటు ఉండాల్సిన సోదరి ఆచూకీ లేకపోవటంతో సందేహాలు వ్యక్తమయ్యాయి.
తొలుత గ్యాంగ్ రేప్ అనుకున్నప్పటికి.. వైద్యులు ఇచ్చిన నివేదికలో గ్యాంగ్ రేప్ జరగలేదన్నట్లుగా ఉన్నట్లు వార్తలు వచ్చాయి. అయితే.. దీనిపై ఎలాంటి అధికారిక ప్రకటన వెలువడలేదు. ఇదిలా ఉంటే.. శుక్రవారం ఉదయం ఈ కేసుకు సంబంధించి కీలక పరిణామం చోటు చేసుకున్నట్లు తెలుస్తోంది. బాధితురాలిపై అత్యాచారం జరిగిందని చెప్పిన రోజున గాంధీలో ఉన్న సెక్యురిటీ గార్డులను పోలీసులు పెద్ద ఎత్తున విచారణ జరిపిన సందర్భంలో షాకింగ్ నిజం బయటకు వచ్చింది.
సెక్యురిటీ గార్డుతో బాధితురాలి వెళ్లినట్లుగా పోలీసులు సీసీ కెమేరా ఫుటేజ్ ను పరిశీలిస్తున్న వేళ బయటకు రావటంతో కొత్త సందేహాలు వ్యక్తమయ్యాయి.
దీంతో.. సెక్యురిటీ గార్డుల్ని విచారించే సమయంలో.. సీసీ కెమేరా ఫుటేజ్ లో కనిపించిన విజయ్ ను తమదైన రీతిలో విచారించగా.. ఆమెను అత్యాచారం చేసినట్లుగా సెక్యురిటీ గార్డు ఒప్పుకున్నట్లుగా చెబుతున్నారు. అయితే.. ఇది అత్యాచారమా? ఇష్టపడి వెళ్లిందా? అన్న సందేహం కూడా వ్యక్తమవుతోంది. దీనిపై క్లారిటీ రాలేదు. ఇదిలా ఉండగా.. గడిచిన కొద్ది రోజులుగా బాధితురాలి సోదరి కనిపించకుండా పోవటం తెలిసిందే.
దీంతో ఆమెను గుర్తించటం కోసం భారీ ఎత్తున పోలీసు టీంలు వెతికిన ప్రయత్నాలు ఫలించాయి. ఈ రోజు ఆమెను హిమాయత్ నగర్ లోని నారాయణగూడ పోలీసులు ఆమెను గుర్తించినట్లుగా తెలుస్తోంది. దీంతో.. ఆమెను అదుపులోకి తీసుకొని విచారిస్తున్నారు. ఆమె నోరు విప్పితే ఎన్నో సందేహాలకు సమాధానాలు లభిస్తాయని చెబుతున్నారు.
