రాజకీయాలతో పాటు సినీ రంగంలోనూ వారసత్వం కొనసాగించడం కామన్. ఈ కోవలోనే ఇరు తెలుగు రాష్ట్రాల్లో ఎందరో తమ రాజకీయ, సినీ వారసులను లాంచ్ చేశారు. ఈ క్రమంలోనే జనసేన అధినేత, సినీ నటుడు పవన్ కల్యాణ్ కూడా తన నట వారసుడు అకీరానందన్ ను సినిమాల్లోకి లాంచ్ చేయబోతున్నారని కొంతకాలంగా ప్రచారం జరుగుతోంది. అందుకే, అకీరా మార్షల్ ఆర్ట్స్ లో శిక్షణ పొందుతున్నాడని కొన్ని వీడియోలు సోషల్ మీడియాలో చాలాకాలంగా చక్కర్లు కొడుతున్నారు.
తాజాగా, నిన్న అకీరా నందన్‌ 18వ పుట్టిన రోజు సందర్భంగా రేణు దేశాయ్ ఇన్‌స్టాగ్రామ్‌లో స్పెషల్‌ వీడియో షేర్‌ చేశారు. అకీరా… తన ట్రైనర్ తో కలిసి స్పారింగ్ (సాధన) చేస్తున్న వీడియో సోషల్ మీడియాలో వైరల్ అయింది. జాబ్, రైట్ హుక్ కాంబినేషన్ లో పంచ్ లు విసురుతూ బాక్సింగ్ లోనూ అకీరా రాటుదేలుతున్నాడని, దీంతో, పవన్ నట వారసుడిగా అకీరానందన్ సినిమాల్లోకి ఎంట్రీ ఇవ్వబోతున్నాడంటూ పవన్ ఫ్యాన్స్ హంగామా చేస్తున్నారు.
ఈ క్రమంలోనే తాజాగా ఆ పుకార్లపై అకీరా తల్లి రేణు దేశాయ్ స్పందించారు. అకీరాకు నటుడయ్యే ఉద్దేశం లేదని, అతడు ఏ సినిమాకీ సంతకం చేయలేదని క్లారిటీ ఇచ్చారు. ఇలాంటి ప్రచారాలను నమ్మొద్దని కోరారు. ‘అకీరా నాకు మంచి తనయుడు మాత్రమే కాదు ఆద్యకు గొప్ప సోదరుడు కూడా! అలాగే అతడి ఫ్రెండ్స్‌కు మంచి మిత్రుడు కూడా! అతడు ఎంతో మంచి మనసున్న జెంటిల్‌మెన్‌. ఈరోజు 18వ పుట్టినరోజు జరుపుకుంటున్న అతడికి అంతా మంచే జరగాలని కోరుకుంటున్నాను. అకీరాకు బర్త్‌డే విషెస్‌ పంపుతున్న అందరికీ పేరుపేరునా కృతజ్ఞతలు’ అని ఇన్ స్టాలో రేణు పోస్ట్ చేశారు.
