కొంతకాలంగా మంచు ఫ్యామిలీ పేరు పలు వివాదాల్లో వినిపిస్తోన్న సంగతి తెలిసిందే. మంచు విష్ణు ఆఫీసులో హెయిర్ డ్రెస్సర్ నాగ శ్రీను చోరీ వ్యవహారం, ఆ తర్వాత మోహన్ బాబు, విష్ణులపై నాగ శ్రీను ఆరోపణలు హాట్ టాపిక్ గా మారాయి. మోహన్ బాబు, విష్ణు క్షమాపణలు చెప్పాలంటూ నాయీ బ్రాహ్మ‌ణ సంఘం నేతలు, జాతీయ బీసీ అసోసియేషన్ అధ్యక్షుడు ఆర్. కృష్ణయ్య డిమాండ్ చేశారు.
ఇక, ఆ తర్వాత ఈ సీన్ లోకి మెగా బ్రదర్ నాగబాబు ఎంట్రీ ఇవ్వడం తీవ్ర చర్చనీయాంశమైంది. మంచు వర్సెన్ మెగా ఫ్యామిలీల మధ్య గతంలో ఉన్న వివాదాలు, మా ఎన్నికల సందర్భంగా ప్రకాష్ రాజ్ కు మెగా మద్దతు నేపథ్యంలో నాగ శ్రీనుకు నాగబాబు ఆర్థిక సాయం చేయడం హాట్ టాపిక్ గా మారింది. దీంతో, నాగ శ్రీను వెనుక నాగబాబు ఉన్నారని సోషల్ మీడియాలో ప్రచారం జరిగింది.
నాగ శ్రీను ఫ్యామిలీకి నాగబాబు రూ.50 వేల చెక్కును అందించడంతో మా ఎన్నికల నాటి ప్రతీకారాన్ని తీర్చుకుంటున్నాడంటూ నాగబాబు మీద కామెంట్లు వచ్చాయి. ఈ నేపథ్యంలో ఆ వ్యవహారంపై తన ఇన్ స్టా ఖాతాలో నాగబాబు స్పందించారు. నాగ శ్రీనుకు తాను చెక్కు ఇచ్చిన మాట వాస్తవమని చెప్పారు. నాగ శ్రీను తనకు మేకప్ వేశారని, తనని అదడు ఎంతో అందంగా మలిచాడని నాగబాబు అన్నారు. అంతేకాదు, నాగబాబు మేకోవర్ కు సంబంధించిన కొన్ని ఫోటోలు కూడా షేర్ చేశారు.
నాగ శ్రీను పనితనం గురించి చెప్పుకొచ్చిన నాగబాబు…తనను ఎంతో స్టైలీష్‌గా మేకోవర్ చేశాడని కొనియాడారు. అంతేకాదు, అతడి ప్రతిభే ఎప్పుడూ అతడి విజయానికి మార్గం సుగమం చేస్తుందని పోస్ట్ చేశారు. తనను ఇలా అందంగా మార్చినందుకు కృతజ్ఞతగా ఆ చెక్కును ఇచ్చానని, నాగ శ్రీను ఇలానే ఎప్పుడూ కష్టపడుతూ ఉండాలని అన్నారు. నాగబాబు తాజా పోస్ట్ తో ఈ వ్యవహారంపై ఓ క్లారిటీ వచ్చినట్లయింది.
