జనసేన అధినేత, టాలీవుడ్ స్టార్ హీరో పవన్ కళ్యాణ్ కు ఉన్న క్రేజ్ గురించి ప్రత్యేకంగా చెప్పనక్కర్లేదు. తెలుగు చలనచిత్ర పరిశ్రమలోని అగ్రనటులలో ఒకరిగా కొనసాగుతున్న పవన్ కళ్యాణ్ కు కోట్లాదిమంది అభిమానులు ఉన్నారుర. ఇక, జనసేనానిగా రాజకీయాలలోకి అడుగుపెట్టిన పవన్ కు లక్షలాదిమంది జనసైనికుల మద్దతు ఉంది. ఈ నేపథ్యంలోనే సోషల్ మీడియాలో పవన్ ను ట్విట్టర్, ఫేస్బుక్ లో ఆయన అభిమానులు విపరీతంగా ఫాలో అవుతుంటారు.
అయితే, ఫేస్ బుక్, ట్విట్టర్ ఖాతాలు ఉన్నప్పటికీ పవన్ ఇన్ స్టా వైపు పెద్దగా ఫోకస్ చేయలేదు. ఈ క్రమంలోనే రాబోయే ఎన్నికల నేపథ్యంలో ఇన్ స్టాలో కూడా పవన్ కళ్యాణ్ తాజాగా నేడు అకౌంట్ ఓపెన్ చేశారు. ఖాతా ఓపెన్ చేసిన కొద్ది గంటల్లోనే ఆయన అభిమానులు లక్షలాది సంఖ్యలో ఫాలో కావడం మొదలుపెట్టారు. ఈ నేపద్యంలోనే పవన్ కళ్యాణ్ సరికొత్త రికార్డును క్రియేట్ చేశారు. ఇన్ స్టా గ్రామ్ అకౌంట్ ఓపెన్ చేసిన కొద్ది గంటల్లోనే 10 లక్షల మంది ఫాలోవర్లను సంపాదించుకున్న ఘనత పవన్ కే దక్కింది.
ఈ రకంగా ఖాతా ఓపెన్ చేసి ఒక పోస్ట్ కూడా చేయకుండానే మిలియన్ ఫాలోవర్లు సాధించిన తొలి నటుడిగా పవన్ రికార్డు సృష్టించారు. ఎలుగెత్తు…ఎదిరించు ఎన్నుకో…జైహింద్ అనే స్లోగన్ ను పవన్ ఇన్ స్టా ప్రొఫైల్ టెక్స్ట్ గా పెట్టారు. ఒక్క పోస్ట్ కూడా చేయకుండానే పవన్ సునామీ రేపుతుండడంతో పోస్టులు పెట్టడం పెట్టడం మొదలుబెడితే ఇంకెన్ని లక్షల మంది ఫాలోవర్స్ వస్తారో అని ఆయన అభిమానులు ఫుల్ జోష్ లో ఉన్నారు. ఇక, పవన్ అకౌంట్ ఓపెన్ చేసిన కొద్దిసేపటికి అఫీషియల్ అకౌంట్ గా గుర్తింపు లభించడం విశేషం.
సాధారణంగా రాజకీయాలకు సంబంధించిన ట్వీట్లను పవన్ ట్విట్టర్ లో చేస్తుంటారు. మామూలుగా అయితే ఇన్ స్టాగ్రామ్ ను సెలబ్రిటీలు, హీరోలు, హీరోయిన్లు క్రీడాకారులు తమ వ్యక్తిగత విషయాలు, ఫొటోలు, వీడియోలు పంచుకునేందుకు ఉపయోగిస్తుంటారు. మరి, పవన్ ఇన్ స్టాగ్రామ్ లో కూడా పొలిటికల్ పోస్టులు పెడతారా లేదంటే పర్సనల్ పోస్టులకి పరిమితం అవుతారా అన్నది తేలాల్సి ఉంది. ఇక, ఇన్ స్టాగ్రామ్ లో పవన్ చేయబోయే తొలి పోస్ట్ దేనికి సంబంధించి ఉంటుంది అన్న క్యూరియాసిటీ పవన్ అభిమానులతో పాటు జనసైనికులను ఉంది. మొదటి పోస్ట్ గా ఓ వీడియోను పవన్ షేర్ చేయబోతున్నట్టుగా తెలుస్తోంది.
