జనసేన అధినేత, ఏపీ డిప్యూటీ సీఎం పవన్ కల్యాణ్ కు ఆయన సోదరుడు, జనసేన నేత నాగబాబు కుడి భుజంగా వ్యవహరించిన సంగతి తెలిసిందే. పవన్ కు రాజకీయాలపరంగా వెన్నంటి ఉన్న నాగబాబు…కూటమిలో పొత్తు ధర్మం కోసం తన ఎంపీ సీటు కూడా త్యాగం చేశారు. ఈ క్రమంలోనే నాగబాబుకు సముచిత పదవినిచ్చి పవన్, సీఎం చంద్రబాబు గౌరవిస్తారని టాక్ వస్తోంది. నామినేటెడ్ పదవుల జాతర మొదలుకాబోతోన్న నేపథ్యంలో నాగబాబుకు కీలక పదవి దక్కబోతోందని ప్రచారం జరుగుతోంది.
నాగబాబును టీటీడీ చైర్మన్గా నియమించబోతున్నారని చాలాకాలంగా ప్రచారం జరుగుతోంది. అయితే, ఆ ప్రచారాన్ని ఖండించిన నాగబాబు…తనకు అటువంటి ఆలోచన లేదని అన్నారు. ఈ క్రమంలోనే ఈ ప్రచారానికి తెరపడింది. ఇక, తాజాగా నాగబాబును ఏపీ ఫిలిం డెవలప్‌మెంట్ కార్పొరేషన్ చైర్మన్గా నియమించే అవకాశాలున్నాయని ప్రచారం జరుగుతోంది. పవన్ కూడా తన సోదరుడికి ఆ పదవి ఇస్తే బాగుంటుందని అభిప్రాయపడ్డారని టాక్ వస్తోంది. మరి, ఈ ప్రచారంలో నిజమెంతో తేలాలంటే మరి కొద్ది రోజులు ఆగక తప్పదు.
