నందమూరి నటసింహం బాలకృష్ణ హోస్ట్ చేస్తున్న అన్ స్టాపబుల్ విత్ ఎన్బీకే టాక్ షో రెండో సీజన్ లో కూడా రికార్డు వ్యూస్ తో దూసుకుపోతోన్న సంగతి తెలిసిందే. ఈ క్రమంలోనే దేశంలోని టాక్ షోలలో కెల్లా టాప్ ర్యాంకింగ్స్ లో అన్ స్టాపబుల్ నిలిచింది. ఈ నేపథ్యంలోనే తాజాగా అన్ స్టాపబుల్ తరహాలోనే తాజాగా టాలీవుడ్ సింగర్, నటి స్మిత సరికొత్త టాక్ షోతో ప్రేక్షకుల ముందుకు రాబోతోంది. సోనీ లివ్ ఓటీటీలో ‘నిజం విత్ స్మిత’…నిజం నిర్భయంగా అంటూ సరికొత్త కాన్సెప్ట్ తో అలరించేందుకు సిద్ధమైంది. తాజాగా ఆ షో ప్రోమో విడుదలైంది.
అన్ స్టాపబుల్ తరహాలోనే ఈ షోలో పలువురు సినీ, రాజకీయ, క్రీడా రంగ ప్రముఖులు, పబ్లిక్ సర్వెంట్లు హాజరై సందడి చేయబోతున్నారు. ఈ టాక్ షో తొలి ఎపిసోడ్ గెస్ట్ గా టాలీవుడ్ మెగాస్టార్ చిరంజీవి హాజరయ్యారు. తాజాగా ఇందుకు సంబంధించిన ప్రోమోను సోనీ టీం విడుదల చేసింది. ఈ షోలో చిరును స్మిత పలు ప్రశ్నలతో ఇరుకున పెట్టేందుకు ప్రయత్నించింది. కాలేజ్ డేస్ లో మీ ఫస్ట్ క్రష్? ఎవరు అన్న ప్రశ్నకు చిరు తెల్లమొహమేశారు.
ఇక, స్టార్ డమ్ అనే స్థాయికి వెళ్లాలంటే ఎన్నో అవమానాలు, అనుమానాలు ఉంటాయిని, చిరుకు ఎలాంటి అనుభవాలు ఉన్నాయని స్మిత ప్రశ్నించింది. జగిత్యాలలో పర్యటించినప్పుడు ముందు తనపై పూలవర్షం కురిసిందని…ఆ తర్వాత కొంచెం ముందుకు వెళ్లగానే కోడిగుడ్లతో కొట్టారని చిరు చెప్పారు. టాలీవుడ్ లో ప్రస్తుతం మరో వరప్రసాద్… మెగాస్టార్ అయ్యే పరిస్థితి ఉందా అంటూ నెపోటిజంపై చిరును స్మిత ప్రశ్నించింది. ఈ షోలో చిరు ఎపిసోడ్ ఈ నెల 10వ తేదీన స్ట్రీమ్ కాబోతోంది. ఆ షో లో తప్పకుండా చిరు రాజకీయ జీవితం గురించి కూడా ప్రశ్నలు ఉంటాయని తెలుస్తోంది. ఏది ఏమైనా ఈ ప్రోమో ప్రస్తుతం సోషల్ మీడియాలో వైరల్ అయింది.
