స‌లార్ రిలీజ్ నెల‌లోకి అడుగు పెట్టేశామ‌ని.. ఇంకో నాలుగు వారాలే విడుద‌ల‌కు స‌మ‌యం ఉంద‌ని అభిమానులు ఉత్సాహంగా సోష‌ల్ మీడియాలో ఆ సినిమా గురించి డిస్క‌ష‌న్లు పెట్టిన స‌మ‌యంలో ఈ రోజు వారికి పెద్ద షాకే త‌గిలింది. స‌లార్ పోస్ట్ ప్రొడ‌క్ష‌న్ ప‌నుల్లో ఆల‌స్యం వ‌ల్ల సెప్టెంబ‌రు 28కి రిలీజ్ సాధ్యం కాద‌ని.. వాయిదా అనివార్యం అని జోరుగా వార్త‌లు వ‌స్తున్నాయి. ఉద‌యం చిన్న‌గా మొద‌లైన ఈ ప్ర‌చారం.. సాయంత్రానికి బాగా ఊపందుకుంది.
టీం నుంచి ఎలాంటి ఖండ‌న‌లు లేవు. 28కి సినిమా రావ‌డం అసాధ్యం అనే అంతా అంటున్నారు. అధికారిక ప్ర‌క‌ట‌న రావ‌డ‌మే త‌రువాయి అని సమాచారం. ఐతే స‌లార్ వాయిదా గురించి ఇలా ప్ర‌చారం మొద‌లైందో లేదో.. ఆ సినిమా విడుద‌ల‌కు కొత్త డేట్ మీద అంద‌రి దృష్టి ప‌డింది. న‌వంబ‌రు లేదా డిసెంబ‌రులో స‌లార్ రావ‌చ్చ‌ని అంటున్నారు. స‌లార్ వాయిదాతో చాలా సినిమాల రిలీజ్ డేట్లు తారుమారు అయ్యే ప‌రిస్థితులు క‌నిపిస్తున్నాయి.
ఆల‌స్యం చేయ‌కుండా సెప్టెంబ‌రు చివ‌రి వారం మీద కొన్ని సినిమాలు క‌ర్చీఫ్‌లు వేసేస్తున్నాయి. ద‌స‌రాకు అనుకున్న ర‌వితేజ సినిమా టైగ‌ర్ నాగేశ్వ‌ర‌రావును ప్రిపోన్ చేసి సెప్టెంబ‌రు 28 లేదా 29న రిలీజ్ చేయాల‌ని చూస్తున్నార‌ట. సినిమా ఆ టైంకి రిలీజ్ చేయ‌గ‌లం అనుకుంటే ఒక‌ట్రెండు రోజుల్లో డేట్ ఇచ్చేస్తార‌ని సమాచారం. మ‌రోవైపు సితార వారి మ్యాడ్ మూవీ 28కి ఫిక్స్ అయిపోయింది.
రిలీజ్ డేట్ విషయంలో అయోమ‌యంలో ఉన్న కిర‌ణ్ అబ్బ‌వ‌రం సినిమా రూల్స్ రంజ‌న్‌ను కూడా ఆ డేట్‌కే ఫిక్స్ చేస్తార‌ట. అలాగే శ్రీకాంత్ అడ్డాల సినిమా పెద‌కాపును కూడా ఈ వీకెండ్‌కే ఖాయం చేయొచ్చంటున్నారు. ఇక స‌లార్ రిలీజ్ ఫిక్స్ అయ్యే డేట్‌ను బ‌ట్టి ఆ టైంకి ఆల్రెడీ షెడ్యూల్ అయిన సినిమాల‌న్నీ డేట్లు మార్చుకోవ‌డం ప‌క్కా.
