నందమూరి నటసింహం బాలకృష్ణతో ‘ఆహా’ఓటీటీ ప్లాట్ ఫాం ఓ టాక్ షోను రూపొందించిన సంగతి తెలిసిందే. బాలకృష్ణను తొలిసారిగా ఓటీటీ ఫ్లాట్ ఫామ్ కు పరిచయం చేస్తున్న ఆహా… ‘అన్ స్టాపబుల్ విత్ ఎన్బికే’ షోతో ప్రేక్షకుల ముందుకు రానుంది. నవంబర్ 4న దీపావళి కానుకగా ‘ఆహా’లో ఈ షో తొలి ఎపిసోడ్ స్ట్రీమ్ కానుంది. నందమూరి బాలకృష్ణ తొలిసారి ఓ కార్యక్రమానికి హోస్టుగా వ్యవహరిస్తుండడంతో…ఈ షో కోసం నందమూరి అభిమానులు ఎంతో ఆతృతగా ఎదురుచూస్తున్నారు.
ఈ నేపథ్యంలోనే ఆ ఆతృతను మరింత పెంచేలా ఈ షో తొలి ఎపిసోడ్ లో ఓ విశిష్ట అతిథి పాల్గొనబోతున్నారని టాక్ వస్తోంది. నందమూరి కుటుంబంతో మంచి అనుబంధం ఉన్న మోహన్ బాబు…ఈ టాక్ షోకు హాజరైన తొలి సెలబ్రిటీగా ట్రెండ్ సెట్ చేయబోతున్నారని ప్రచారం జరుగుతోంది. ఈ షోలో బాలయ్యతో మోహన్ బాబు తన మనసువిప్పి మాట్లాడబోతున్నారని, ఇప్పటివరకూ బయటపెట్టని ఎన్నో విషయాలను బాలకృష్ణతో షేర్ చేసుకోబోతున్నారని తెలుస్తోంది.
ఈ క్రమంలోనే ఆ టాక్ షో సెట్‌లో బాలకృష్ణతో మోహన్‌బాబు దిగిన ఫొటోలు వైరల్‌ అయ్యాయి. అంతేకాదు, ఈ షో రెండో ఎపిసోడ్ లో మెగా కుటుంబం నుంచి నాగబాబు పాల్గొన్నారని కూడా ప్రచారం జరుగుతోంది. వాస్తవానికి బాలయ్యకు ఈ తరహా టాక్ షోలలో హోస్ట్ గా వ్యవహరించేందుకు పెద్దగా ఆసక్తి లేదని, కానీ, ఈ షో కాన్సెప్ట్ తెలుసుకున్న తర్వాత బాలయ్య ఈ షో చేసేందుకు అంగీకరించారని తెలుస్తోంది.
