కర్మ హిట్స్ బ్యాక్ అన్న పదాలు ప్రస్తుతం కొడాలి నాని కి సరిగ్గా సరిపోతాయి. 2004 నుంచి 2019 వరకు గుడివాడ నియోజకవర్గం నుంచి వరుసగా ఎమ్మెల్యేగా ఎన్నికైన కొడాలి నాని.. గత జగన్ మోహన్ రెడ్డి ప్రభుత్వంలో మంత్రిగా కూడా పనిచేశారు. అయితే ఆ సమయంలో కొడాలి నాని చంద్రబాబు నాయుడు మరియు టీడీపీ నాయకులపై నోటి దురుసు చూపించారు. ఇష్టం వచ్చినట్లుగా ఛాలెంజ్ లు చేస్తూ వార్తల్లో నిలిచారు. కానీ ఈసారి కొడాలి నానికి ఓటర్లు దిమ్మతిరిగే షాక్ ఇచ్చారు. ఇటీవల జరిగిన సార్వత్రిక ఎన్నికల్లో కొడాలి నాని ఓడిపోవడమే కాకుండా వైఎస్ఆర్‌సీపీ ఘోర ప‌రాజయాన్ని మూటగ‌ట్టుకుంది.
అప్పటినుంచి ఆ పార్టీ ముఖ్య నేతలపై విమర్శలు మొదలయ్యాయి. ముఖ్యంగా కొడాలి నానిని సోషల్ మీడియా వేదిక‌గా ఓ రేంజ్ లో ఏకేస్తున్నారు. గతంలో ఒకానొక సమయంలో కొడాలి నాని మాట్లాడుతూ.. `ఈసారి ఎన్నికల్లో కుప్పం నుంచి చంద్రబాబు గెలిస్తే ఆయన షూ పాలిష్ చేస్తూ.. కాళ్ల దగ్గరే పడి ఉంటాను` అంటూ ఛాలెంజ్ విసిరారు. కట్ చేస్తే చంద్రబాబు కుప్పం నుంచి భారీ మెజారిటీతో గెలవడమే కాకుండా ఏపీ లో నాలుగోసారి ముఖ్యమంత్రిగా అధికారాన్ని కూడా చేపట్టారు. దీంతో ఆనాడు కొడాలి నాని విసిరిన ఛాలెంజ్ తెరపైకి వచ్చింది.
గుంటూరులో పలువురు టీడీపీ మద్దతుదారులు కొడాలి నాని చంద్రబాబు బూట్లు తుడుస్తున్న‌ట్లుగా ఫ్లెక్సీలు త‌యారు చేయించి ప్ర‌ద‌ర్శిస్తున్నారు. చంద్ర‌బాబుపై ఛాలెంజ్ చేసిన పిరికి సన్నాసి కొడాలి నాని ఎక్కడ.. బయటికి రావాలంటూ ఫ్లెక్సీలపై రాయించారు. తెలుగుదేశం కార్యనిర్వహక కార్యదర్శి కనపర్తి పేరుతో ఏర్పాటు చేయించిన ఈ ఫ్లెక్సీలు ప్రస్తుతం గుంటూరులో టాక్ ఆఫ్ ది టౌన్ గా మారాయి. మ‌రోవైపు ఇదే విజ‌యంపై నెటిజ‌న్లు కూడా రియాక్ట్ అవుతున్నారు. ఎన్నికల ముందు చేసిన ఛాలెంజ్ ప్రకారం కొడాలి నాని చంద్రబాబు షూ పాలిష్ చేయాల్సిందే అంటూ డిమాండ్ చేస్తున్నారు. సవాల్ చేయడమే కాదు.. మాట నిల‌బెట్టుకోవాలంటూ కొడాలిని కామెంట్ల‌తో ఎటాక్ చేస్తున్నారు.
