వైఎస్సార్ కాంగ్రెస్ టెక్క‌లి ఎమ్మెల్సీ దువ్వాడ శ్రీనివాస్, దివ్వెల మాధురి, దువ్వాడ వాణిల ఇష్యూ గ‌త వారం రోజుల నుంచి రాష్ట్రంలో హాట్ టాపిక్ గా మారిన సంగ‌తి తెలిసిందే. దువ్వాడ ఇంటి ర‌చ్చ ట్విస్టుల మీద ట్విస్టుల‌తో ముందుకు సాగుతోంది. వ్యక్తిగతంగా టార్గెట్ చేసుకుని సోషల్ మీడియాలో ట్రోల్స్ చేస్తుండ‌టంతో మ‌నస్థాపానికి గురైన దివ్వెల మాధురి.. ఆత్మ‌హ‌త్య‌కు పాల్ప‌డింది.
ఆదివారం మధ్యాహ్నం పలాస మండలం లక్ష్మీపురం టోల్ గేట్ సమీపంలో ఆగి ఉన్న కారును త‌న కారుతో ఢీకొట్టి ఆత్మ‌హత్యాయ‌త్నం చేశారు. ఈ ప్రమాదంలో గాయ‌ప‌డిన మాధురి.. పలాస లోని ఓ ప్రైవేటు ఆస్పత్రిలో చికిత్స పొంది కోలుకున్నారు. ఇదిలా ఉంటే.. దువ్వాడ కుటుంబ క‌థా చిత్రంలో తాజాగా దివ్వెల మాధురి భ‌ర్త మ‌హేష్ చంద్రబోస్ ఎంట్రీ ఇచ్చారు.
అమెరికాలో ఉంటున్న మ‌హేష్ మీడియాతో మాట్లాడుతూ.. మాధురిపై ఆస‌క్తిక‌ర వ్యాఖ్య‌లు చేశారు. నా భార్య ఏంటో నాకు తెలుస‌ని.. ఆమెపై నాకు పూర్తి న‌మ్మ‌కం ఉంద‌ని మ‌హేష్ అన్నారు. నిజానికి తాను టీడీపీ ఫ్యాన్ అని.. త‌న భార్య మాధురి జ‌గ‌న్ కు అభిమాన‌ని మ‌హేష్ తెలిపాడు. త‌న‌కు రాజ‌కీయాల‌పై ఆస‌క్తి లేక‌పోయినా మాధురి ఇంట్రెస్ట్ చూప‌డంతో వైసీపీలో చేర‌డానికి ఓకే చెప్పాన‌ని మ‌హేష్ వివ‌రించాడు.
త‌న భార్య‌పై త‌న‌కు పూర్తి న‌మ్మ‌కం ఉంద‌ని.. రాజకీయంగా ఎదుగుతుందన్న కారణంతో మాధురిని వ్యక్తిగతంగా టార్గెట్ చేసి ఇబ్బంది పెడుతున్నార‌ని మ‌హేష్ అస‌హ‌నం వ్య‌క్తం చేశారు. మాధురి మంచి డ్యాన్స‌ర్.. కానీ ఆమె చేస్తున్న డ్యాన్సుల‌ను కూడా ట్రోల్ చేస్తున్నార‌ని మండిప‌డ్డారు. మాధురి గురించి ఎవరేం చెప్పినా తాను నమ్మేది లేదని.. ఆమెకు త‌న ఫుల్ స‌పోర్ట్ ఉంటుంద‌ని మ‌హేష్ పేర్కొన్నారు. ఇక ఈ క్ర‌మంలోనే దువ్వాడ శ్రీనివాస్ ఇంట్లో మాధురి ఎందుకు ఉంటుంద‌ని యాంక‌ర్ ప్ర‌శ్నంచ‌గా.. మ‌హేష్ నో కామెంట్స్ అన‌డం గ‌మ‌నార్హం.
