మంచి పేరుంది కదా.. దర్శకులు, నిర్మాతలు తనతో సినిమా చేయడానికి పోటీ పడుతున్నారు కదా అని.. హడావుడిగా సినిమాలు చేయట్లేదు అడివి శేష్. తనను నమ్మి థియేటర్లకు వచ్చే వాళ్లకు అత్యుత్తమ వినోదాన్ని అందించాలనే తపనతో అతను నెమ్మదిగా సినిమాలు చేస్తున్నాడు. ‘క్షణం’ దగ్గర్నుంచి సినిమా సినిమాకూ తనపై అంచనాలు పెంచేస్తున్న శేష్.. చివరగా ‘మేజర్’తో తన కెరీర్లోనే బిగ్గెస్ట్ హిట్ కొట్టాడు. దీని తర్వాత బాగా టైం తీసుకుని ‘గూఢచారి’ సీక్వెల్‌ను మొదలుపెట్టాడు. దాంతో పాటే ‘డెకాయిట్’ అనే మరో చిత్రాన్ని కూడా అతను లైన్లో పెట్టిన సంగతి తెలిసిందే. ఇవి రెండూ సమాంతరంగా చిత్రీకరణ జరుపుకుంటున్నాయి. కానీ వీటిలో ఏదీ ఈ ఏడాది విడుదలయ్యే అవకాశాలు లేవు. రెండూ 2025నే టార్గెట్ చేశాయి. కానీ వీటితో పాటుగా ఇప్పుడు ఇంకో సినిమా కూడా లైన్లోకి రావడం విశేషం.
2025లో తన నుంచి మూడు రిలీజ్‌లు ఉంటాయని శేష్ తాజాగా ‘ఎక్స్’లో పోస్టు పెట్టి ఊరించాడు. దీంతో తన ఫ్యాన్స్ అందరూ ఒక్కసారిగా షాక్ అయిపోయారు. ఆచితూచి సినిమాలు చేసే శేష్.. ఇప్పుడు చేస్తున్న రెండు సినిమాలకు తోడు ఇంకోటి పూర్తి చేసి వచ్చే ఏడాది రిలీజ్ చేస్తాననడం సర్ప్రైజింగ్‌గానే అనిపిస్తోంది.
గూఢచారి-2, డెకాయిట్ సినిమాలను అతను పూర్తి చేసి ప్రేక్షకుల ముందుకు తెచ్చేసరికి వచ్చే ఏడాదిలో సగం గడిచిపోతుంది. ఆ తర్వాత తన వేగానికి కొత్త సినిమాను పూర్తి చేసి ఏడాది చివర్లోపు రిలీజ్ చేయడమంటే అంత తేలిక కాదు. ఐతే ఇప్పటికే స్క్రిప్టు ఓకే చేసి పక్కాగా షూటింగ్‌కు ప్లాన్ చేసి ఉంటేనే శేష్ ఇంత ధీమాగా మూడు రిలీజ్‌ల మాట చెప్పి ఉండొచ్చు. మరి అతను ఓకే చేసిన సీక్రెట్ మూవీ ఏంటి అన్నది ఆసక్తికరం. త్వరలోనే దాని వివరాలు బయటికి వస్తాయేమో చూడాలి.
