హాలీవుడ్ యువ కథనాయకుల్లో కేవలం నటనకు పరిమితం కాకుండా మల్టీ టాలెంట్ చూపించే హీరోలు కొందరున్నారు. అడివి శేష్, సిద్దు జొన్నలగడ్డ, విశ్వక్ లాంటి వాళ్ళు ఆ కోవకే చెందుతారు. వీరిలో విశ్వక్సేన్ ఇప్పటికే రైటింగ్, డైరెక్షన్, ప్రొడక్షన్ అన్ని చేసేశాడు. విశ్వక్ చివరి సినిమా దాస్ కా ధమ్కీకి అతనే రైటర్, డైరెక్టర్, ప్రొడ్యూసర్ అన్న సంగతి తెలిసిందే. ఇప్పుడు తన సొంత బేనర్లో విశ్వక్ మరో సినిమా చేయబోతున్నాడు.
ఈ చిత్రానికి అతను దర్శకుడు, హీరో కాదు. రైటర్, ప్రొడ్యూసర్ మాత్రమే. ఆ సినిమాకు కల్ట్ అనే వెరైటీ టైటిల్ పెట్టాడు. ఈ రోజే ఈ సినిమా అనౌన్స్ అయింది. విశ్వక్ కథతో తాజుద్దీన్ అనే కొత్త దర్శకుడు ఈ సినిమాను రూపొందించబోతున్నాడు. ఫలక్ నుమా దాస్, దాస్ కా ధమ్కీ చిత్రాలను ప్రొడ్యూస్ చేసిన విశ్వక్ కుటుంబ సంస్థ వాన్మయి క్రియేషన్స్ తో పాటు.. విశ్వక్ కొత్తగా మొదలుపెట్టిన విశ్వక్సేన్ సినిమాస్ ఈ చిత్రాన్ని ప్రొడ్యూస్ చేయబోతున్నాయి.
ఈ మూవీలో అందరూ కొత్త నటీనటులే ముఖ్యపాత్రలు పోషించబోతున్నారట. విశ్వక్ ఇందులో హీరోగా నటించట్లేదు. క్యామియో రోల్ లాంటిది చేస్తే చేయొచ్చు. నటుడిగా కొత్తలో అవకాశాలు అందుకోవడానికి తాను పడ్డ ఇబ్బందులను దృష్టిలో ఉంచుకొని.. కొత్త వాళ్లకు ఛాన్సులు ఇవ్వడానికే విశ్వక్ ఈ సినిమా చేస్తున్నాడట. ఈ చిత్రంతో కొందరు టాలెంటెడ్ కాస్ట్ అండ్ క్రూను అతను పరిచయం చేయబోతున్నాడు.
త్వరలో వారి వివరాలు వెల్లడిస్తారు. ప్రస్తుతం విశ్వక్ నటిస్తున్న గ్యాంగ్స్ ఆఫ్ గోదావరి చిత్రీకరణ చివరి దశలో ఉంది. ఈ మూవీ ఫిబ్రవరిలో విడుదల కానున్న సంగతి తెలిసిందే. విశ్వక్ ఎప్పుడో పూర్తి చేసిన గామి అనే సినిమా విడుదల కోసం ఎదురుచూస్తోంది.
