టాలీవుడ్ స్టార్ హీరోలలో ఒకరైన పవన్ కల్యాణ్, మెగా హీరో సాయి ధరమ్ తేజ్ ల కాంబినేషన్ లో వెటరన్ యాక్టర్, డైరెక్టర్ సముద్రఖని తెరకెక్కించిన ‘బ్రో’ సినిమా ఈ నెల 28న ప్రపంచవ్యాప్తంగా విడుదలకు సిద్ధమవుతోన్న సంగతి తెలిసిందే. తమిళ చిత్రం ‘వినోదయా సితం’ రీమేక్ గా వస్తోన్న ఈ చిత్రానికి మాటల మాంత్రికుడు, గురూజీ త్రివిక్రమ్ స్క్రీన్ ప్లే-సంభాషణలు అందించడంతో ఈ సినిమాపై పవన్ ఫ్యాన్స్ భారీ అంచనాలు పెట్టుకున్నారు.
ఈ క్రమంలోనే ఇప్పటికే రిలీజ్ అయిన ఈ చిత్ర ట్రైలర్ యూట్యూబ్ లో ట్రెండ్ అవుతోంది. మాటల మాంత్రికుడి డైలాగులకు మామా అల్లుళ్ల అల్లరి తోడవడంతో ‘బ్రో’ ట్రైలర్ రికార్డు వ్యూస్ తో దూసుకుపోతోంది. ఈ నేపథ్యంలోనే తాజాగా ఈ చిత్రం నుంచి థీమ్ ఆఫ్ ‘బ్రో’ లిరికల్ వీడియో సాంగ్ ను చిత్ర యూనిట్ రిలీజ్ చేసింది. పవన్..‘టైం ’పాత్రను బేస్ చేసుకొని ఆ పాటను రచించారు. కాలం కాన్సెప్ట్ కు, థీమ్ కు తగ్గట్లుగా సంస్కృత పదాలు కొన్ని టచ్ చేస్తూ ఈ పాట సాగింది.
సినిమాలో పవన్ పాత్రను హైలైట్ చేసే సందర్భంలో ఈ పాట వచ్చేలా కనిపిస్తోంది. కల్యాణ్ చక్రవర్తి రచించిన ఈ పాటకు థమన్ సంగీతాన్ని అందించారు. ఇక, ఈ రోజు సాయంత్రం ఈ చిత్ర ప్రీ రిలీజ్ ఈవెంట్ హైదరాబాద్ లో జరగనుంది. ఈ ఈవెంట్ లో ఈ చిత్రం నుంచి రెండో ట్రైలర్ ను రిలీజ్ చేస్తారన్న టాక్ వస్తోంది.
