ఏపీలో జగన్ ప్రభుత్వం తీసుకువచ్చిన జీవో నంబర్ 1 వ్యవహారం పెను దుమారం రేపిన సంగతి తెలిసిందే. ఏపీలో రహదారులపై రోడ్డు షోలు, సభలు, సమావేశాలు నిర్వహించకుండా నియంత్రించేలా తెచ్చిన ఈ జీవోపై ప్రతిపక్ష పార్టీలతో పాటు ప్రజా సంఘాలు కూడా మండిపడ్డాయి. ఈ క్రమంలోనే జగన్ నియంతృత్వ పోకడలను ప్రతిపక్ష నేతలంతా ముక్తకంఠంతో ఖండించారు. ఈ నేపథ్యంలోనే ఆ జీవోను రద్దు చేయాలంటూ ఏపీ హైకోర్టును సీపీఐ రాష్ట్ర కార్యదర్శి రామకృష్ణ గతంలో ఆశ్రయించగా.. ఆ జీవోను నిలిపివేస్తూ రాష్ట్ర ఉన్నత న్యాయస్తానం మధ్యంతర ఉత్తర్వులు జారీ చేసింది.
కానీ, యథా ప్రకారం ఏపీ హైకోర్టు మధ్యంతర ఉత్తర్వులను సవాల్ చేస్తూ జగన్ సర్కార్ సుప్రీంకోర్టులో పిటిషన్ దాఖలు చేసింది. దీంతో, తాజాగా నేడు దేశపు అత్యున్నత న్యాయస్థానం ఆ పిటిషన్ పై విచారణ చేపట్టింది. ఈ సందర్భంగా ఏపీ ప్రభుత్వానికి సుప్రీం కోర్టు షాకిచ్చింది. ప్రస్తుత పరిస్థితుల్లో జీవో నంబర్1పై జోక్యం చేసుకోలేమని సుప్రీం కోర్టు అభిప్రాయపడింది. అంతేకాదు, ఈ పిటిషన్ పై సుప్రీం కోర్టులో విచారణ ముగిస్తున్నామని ప్రకటించింది.
ఈ నెల 23న ఏపీ హైకోర్టు ప్రధాన న్యాయమూర్తితో కూడిన ధర్మాసనమే దీనిపై విచారణ చేపడుతుందని సుప్రీం కోర్టు ధర్మాసనం స్పష్టం చేసింది. ఈ నెల 23న హైకోర్టు ధర్మాసనం ఈ వ్యవహారంపై విచారణ చేబట్టాలని సర్వోన్నత న్యాయస్థానం స్పష్టం చేసింది. అంతేకాదు, ఆ ధర్మాసనం ముందే అన్ని అంశాలను ప్రస్తావించాలని జగన్ ప్రభుత్వానికి సుప్రీం కోర్టు సూచించింది. సుప్రీం కోర్టు తాజా ఆదేశాలతో జగన్ కు సుప్రీం కోర్టులో షాక్ తగిలినట్లయింది.
