మెగాస్టార్ చిరంజీవి వారసుడు రామ్ చరణ్ ఎంత పెద్ద స్టార్ అయ్యాడో తెలిసిందే. ఇక నందమూరి కుటుంబం నుంచి తర్వాతి తరంలో తెరంగేట్రం చేసిన జూనియర్ ఎన్టీఆర్ కూడా సూపర్ స్టార్ ఇమేజ్ సంపాదించాడు. ఇక ఇదే తరంలో హీరో అయిన మరో మెగా వారసుడు అల్లు అర్జున్ కూడా తిరుగులేని స్థాయిని అందుకున్నాడు.
తన కొడుకులు కూడా ఇదే రేంజికి ఎదుగుతారని చాలా ఆశపడ్డాడు అక్కినేని నాగార్జున. లెగసీ పరంగా ఈ కుటుంబాల్లో వేటికీ తగ్గనిదే అక్కినేని ఫ్యామిలీ. కానీ నాగ్ వారసులు ఇద్దరిలో ఒక్కరూ పెద్ద స్టార్ కాలేకపోయారు. ‘జోష్’ సినిమాతో ఎంట్రీ ఇచ్చిన చైతూ.. పుష్కర కాలం నుంచి స్టార్ ఇమేజ్ కోసం కష్టపడుతున్నాడు. కానీ ఒక స్థాయికి మించి అతను ఎదగలేకపోతున్నాడు. ఐతే ఒకప్పటితో పోలిస్తే గత కొన్నేళ్లలో అతడి పరిస్థితి చాలా మెరుగే.
ఒక‌ప్పుడు నిల‌క‌డ‌గా విజ‌యాలందుకోలేక బాగా ఇబ్బంది ప‌డ్డ అతను.. కొన్నేళ్ల నుంచి వ‌రుస హిట్ల‌తో దూసుకుపోతున్నాడు. ఈ విషయంలో అతడికి అదృష్టం బాగా కలిసొస్తోంది కూడా. ఫ్లాప్ కావాల్సిన సినిమాలు కూడా హిట్టయిపోతున్నాయంటే.. జస్ట్ హిట్టవ్వాల్సినవి బ్లాక్‌బస్టర్లు అవుతున్నాయంటే అదృష్టం కాక మరేమిటి. అయితే, కొందరు సమంతను వదిలేశాక విజయాలు చైతూ గర్ల్ ఫ్రెండ్స్ అయ్యాయి అంటున్నారు కొందరు.
చివరగా నాలుగేళ్ల కిందట ‘సవ్యసాచి’ సినిమాతో డిజాస్టర్ ఎదుర్కొన్నాడు చైతూ. ఆ తర్వాత అతడికి ఫ్లాపే లేదు. క్యామియో రోల్ చేసిన ‘ఓ బేబీ’ సహా అన్నీ విజయాలే దక్కాయి. 2019లో వచ్చిన ‘మ‌జిలీ’తో కెరీర్లోనే బిగ్గెస్ట్ హిట్ కొట్టాడు చైతూ. ఆ సినిమాకు మంచి టాకే వ‌చ్చిన‌ప్ప‌టికీ.. అంత పెద్ద బ్లాక్‌బ‌స్ట‌ర్ అయ్యే సినిమా మాత్రం కాద‌ది.
ఇందులో చైతూను మించి స‌మంత పాత్ర, న‌ట‌న హైలైట్ అయింది. ఆ తర్వాత తన మావయ్య వెంకేటష్‌తో కలిసి చైతూ చేసిన ‘వెంకీ మామ’ అయితే చాలా యావరేజ్ మూవీ. దానికి రిలీజ్ టైమింగ్ కలిసొచ్చి హిట్టయింది. ఇక గత ఏడాది విడుద‌లైన ‘లవ్ స్టోరి’ సంగ‌తి తెలిసిందే. ఈ సినిమాకు డివైడ్ టాక్ వచ్చినా కరోనా సెకండ్ వేవ్ తర్వాత ఒక స్థాయి సినిమా కోసం జనాలు ఎదురు చూస్తున్న టైంలో మంచి హైప్‌తో రావడం కలిసొచ్చి భారీ వసూళ్లు రాబట్టింది. సినిమా హిట్ స్టేటస్ అందుకుంది.
ఇక ‘లవ్ స్టోరి’ వచ్చిన నాలుగు నెలల్లోపే ఇంకో హిట్ ఖాతాలో వేసుకున్నాడు చైతూ. సంక్రాంతికి రిలీజైన ‘బంగార్రాజు’కు టాక్ ఏమాత్రం బాగా లేదు. కానీ పండుగ టైంలో దీనికి పోటీ ఇచ్చే మరో సినిమా లేకపోవడంతో ఇది కూడా హిట్టయిపోయింది. మొత్తానికి ఏదో ఒక అంశం కలిసొచ్చి, అదృష్టం తోడై చైతూ హిట్ల మీద హిట్లు కొట్టేస్తున్నాడు. కానీ అతను నెక్స్ట్ లెవెల్‌కు వెళ్లాలంటే మాత్రం అతడి స్టామినా మీద నడిచే మంచి మాస్ మూవీ పడాల్సిందే.
