ఏపీలో టీడీపీ నేతృత్వంలోని ఎన్డీఏ కూటమి 164 శాసన సభ స్థానాలను గెలుచుకొని ప్రభుత్వాన్ని ఏర్పాటు చేయబోతోన్న సంగతి తెలిసిందే. ఈ క్రమంలోనే ఈ నెల 12 టీడీపీ అధినేత చంద్రబాబు ఏపీ నూతన ముఖ్యమంత్రిగా ప్రమాణ స్వీకారం చేయబోతున్నారు. చంద్రబాబు నాలుగోసారి ముఖ్యమంత్రిగా అమరావతిలో ప్రమాణ స్వీకారం చేస్తారని ప్రచారం జరిగింది. అయితే, ఆ వేదిక మారింది.
జూన్ 12వతేదీ ఉదయం 11.27 గంటలకు గన్నవరం ఎయిర్ పోర్టు సమీపంలోని కేసరపల్లి ఐటీ పార్కు వద్ద చంద్రబాబు ప్రమాణ స్వీకార కార్యక్రమం నిర్వహించనున్నారు. అమరావతితోపాటు మంగళగిరి ఎయిమ్స్ వద్ద స్థలాన్ని పరిశీలించినప్పటికీ అనువుగా లేకపోవడంతో గన్నవరం దగ్గర స్థలాన్ని ఖరారు చేశారు.
చంద్రబాబు ప్రమాణ స్వీకారోత్సవ కార్యక్రమానికి భారత ప్రధాని నరేంద్ర మోడీ, ఎన్డీఏలోకి కీలక నేతలు, పలువురు ముఖ్యమంత్రులు హాజరు కాబోతున్నారు.
ఈ కార్యక్రమ ఏర్పాట్లు చకచకా జరుగుతున్నాయి. టీడీపీ అగ్రనేతలు అచ్చెన్నాయుడు, టీడీ జనార్దన్ తదితరులు ప్రమాణ స్వీకార సభా స్థలాన్ని పరిశీలించారు. ఈ నెల 9న ప్రధాని మోడీ ప్రమాణ స్వీకార కార్యక్రమం ఉండడంతో చంద్రబాబు ప్రమాణ స్వీకారం 12వ తేదీన జరగనుంది.
