అడుసు తొక్కి కాలు క‌డ‌గ‌డం అంటే ఇదే. ప్ర‌పంచానికి సుద్ద‌లు చెప్పిన ప‌తంజ‌లి గురువు.. బాబా రాందేవ్.. దేశ‌వ్యాప్తంగా మ‌హిళ‌ల‌కు క్షమాపణలు చెప్పారు. మహిళల వస్త్రధారణపై చేసిన వ్యాఖ్యలు తీవ్ర దుమారానికి దారితీసిన విష‌యం తెలిసిందే. దీనిపై అన్ని వైపుల నుంచి ఆయ‌న‌పై తీవ్ర నిర‌స‌న వ్య‌క్తం కావ‌డంతో చివ‌ర‌కు దిగి వ‌చ్చారు. నేను సిగ్గుప‌డుతున్నా.. అలాంటి వ్యాఖ్యలు చేయ‌డం నా ఉద్దేశం కాద‌ని లెంప‌లేసుకున్నారు. దేశ‌వ్యాప్తంగా మ‌హిళ‌ల‌కు క్షమాపణలు చెపుతున్న‌ట్టు తెలిపారు.
మహిళలను కించపర్చాలన్న ఉద్దేశం తనకు లేదన్న ఆయన తన వ్యాఖ్యలతో ఎవరైనా బాధపడినట్లయి తే అందుకు తనను క్షమించాలని కోరారు. మ‌హిళ‌లు.. బ‌ట్టులు లేకున్నా ఎంతో అందంగా ఉంటార‌ని బాబా వ్యాఖ్యానించిన విష‌యం దేశ‌వ్యాప్తంగా దుమారం రేపింది. కొంద‌రు దీనినిన్యాయ‌స్థాన‌ల దిశ‌గా తీసుకువెళ్లేందుకు రెడీ అయ్యారు. దీంతో మహిళలను కించపర్చాలన్న ఉద్దేశం తనకు లేద‌ని త‌ప్పును స‌రిదిద్దుకునే ప్ర‌య‌త్నం చేశారు.
ఇక, ఇదే విష‌యాన్ని ఆయన మహారాష్ట్ర మహిళా కమిషన్‌ ఛైర్‌పర్సన్‌ రూపాలి చకాంకర్ కి కూడా లిఖిత పూర్వ‌కంగా తెలిపారు. ఆయన పంపిన లేఖను కూడా ఆమె తన ట్విట్ట‌ర్‌లో పోస్టు చేశారు. మహిళల సాధికారత కోసం తాను ఎల్లప్పుడూ కృషి చేస్తానని రాందేవ్ లేఖలో పేర్కొన్నారు. కేంద్రం చేపట్టిన ‘బేటీ బచావో – బేటీ పడావో’ కార్యక్రమాలను తాను ప్రోత్సహించినట్లు చెప్పుకొచ్చారు.
సామాజిక మాధ్యమాల్లో వైరల్ అవుతోన్న వీడియో క్లిప్‌ పూర్తిగా వాస్తవం కాదన్నారు రాందేవ్. తన వ్యాఖ్యలకు ఎవరైనా బాధపడినట్లయితే తీవ్రంగా చింతిస్తున్నట్లు చెప్పారు. గత శుక్రవారం మహారాష్ట్రలోని ఠానే నగరంలో జరిగిన యోగా సైన్స్‌ శిబిరంలో మహిళలపై బాబా రాందేవ్ అనుచిత వ్యాఖ్యలు చేశారు. బ‌ట్ట‌లు వేసుకోక‌పోయినా.. మ‌హిళ‌లు అందంగా ఉంటార‌ని అన్నారు.
