సౌత్ సంగతి పక్కనబెడితే నార్త్ ఇండియాలో ‘ఇండియన్ ఐడల్‘ షోకు విపరీతమైన క్రేజ్ ఉంది. ఎంతోమంది టాలెంటెడ్ సింగర్స్ ను అందించిన షో 12వ సీజన్ విజయవంతంగా నడుస్తోంది. కరోనా నేపథ్యంలో మధ్యలో కొంచెం బ్రేక్ వచ్చిన తర్వాత…ఈ షో కంటిన్యూ చేశారు. ఈ క్రమంలోనే ఆగస్టు 15న ‘ఇండియన్ ఐడల్ 12’ గ్రాండ్ ఫినాలే జరగనుంది. ఈ సారి ఇండియన్ ఐడల్ లో తెలుగమ్మాయి షణ్ముఖ ప్రియ అదరగొడుతూ ఫైనల్స్ కు చేరుకుంది.
ఈ నేపథ్యంలోనే టాలీవుడ్ రౌడీ హీరో విజయ్ దేవరకొండ…షణ్ముఖ ప్రియకు ఆల్ ది బెస్ట్ చెబుతూ వీడియో సందేశాన్ని పంపాడు. ఆంధ్రా అమ్మాయి షణ్ముఖ ప్రియ కోసం లైగర్ పంపిన స్పెషల్ వీడియోను షోలో ప్లే చేశారు. ఈ సీజన్ విన్నర్ షణ్ముఖ ప్రియ అని, ‘ఇండియన్ ఐడల్ 12’ టైటిల్ ఆమె తప్పక గెలుస్తుందని రౌడీ హీరో కాన్ఫిడెంట్ గా చెప్పాడు. షణ్ముఖ పర్ఫామెన్స్ తాను ఫాలో అవుతుంటానని చెప్పాడు విజయ్. ఆమె ఖచ్చితంగా టైటిల్ గెలుస్తుందని అభిప్రాయపడ్డాడు. ఎంతోమంది అమ్మాయిల హృదయాలను కొల్లగొట్టిన రౌడీ హీరో తన కోసం ప్రత్యేక వీడియో చేయడంతో షణ్ముఖ ప్రియ ఎంతో పొంగిపోయింది.
దీంతోపాటు షణ్ముఖ ప్రియకు విజయ్ దేవరకొండ మరో బంపర్ ఆఫర్ ఇచ్చాడు. షణ్ముఖ ప్రియ హైదరాబాద్ కు తిరిగి రాగానే తన సినిమాలో ఓ పాట పాడే చాన్స్ ఇస్తానని చెప్పడంతో షణ్ముఖ ప్రియ ఎగిరి గంతేసింది. ఇప్పటికే షణ్ముఖ ప్రియ కోసం సోషల్ మీడియాలో ఆమె అభిమానులు క్యాంపెయిన్ చేస్తున్నారు. తాజాగా విజయ్ దేవరకొండ బ్లెస్సింగ్స్ వీడియోను కూడా వారు వైరల్ చేస్తున్నారు. ఇక, ఆదివారం మధ్యాహ్నం 12 నుంచీ రాత్రి 12 దాకా 12 గంటల పాటూ జరగబోతోన్న ఈ గ్రాండ్ ఫినాలే కోసం నిర్వాహకులు భారీ ఏర్పాట్లు చేశారు.
ఆదివారం, స్వాతంత్ర్య దినోత్సవం కావడంతో ఈ షోను కోట్లాదిమంది వీక్షిస్తారని అంచనా. 2010లో మైనంపాటి శ్రీరామ చంద్ర ఇండియన్ ఐడల్ టైటిల్ గెలుచుకున్న తొలి తెలుగు కంటెస్టెంట్ గా రికార్డు క్రియేట్ సంగతి తెలిసిందే. మరి, ఇండియన్ ఐడల్ టైటిల్ గెలిచిన తొలి ఫిమేల్ సింగర్ గా షణ్ముఖ ప్రియ రికార్డ్ క్రియేట్ చేస్తుందో లేదో తెలియాలంటే మరి కొద్ది గంటలు వెయిట్ చేయాల్సిందే. ఇప్పటి దాకా ఈ సీజన్లో అద్భుత ప్రదర్శన కనబరిచిన షణ్ముఖ ప్రియ…ఫినాలేలోనూ తన మ్యాజికల్ వాయిస్ తో పాడి టైటిల్ గెలవాలని కోరుకుంటూ…షణ్ముఖ ప్రియకు ఆల్ ది బెస్ట్ చెబుదాం.
