ఏపీ ముఖ్య‌మంత్రి, తెలుగుదేశం పార్టీ జాతీయ అధ్య‌క్ష‌డు నారా చంద్రబాబు నాయుడు వినూత్న కార్యక్రమానికి శ్రీ‌కారం చుడుతున్నారు. ఈ మేర‌కు బుధ‌వారం అసెంబ్లీ వేదిక‌గా చంద్రబాబు ప్రకటన చేశారు. ప్ర‌తి నెలా చివ‌రి ఆదివారం ఉద‌యం కాగానే ప్ర‌ధానమంత్రి మన్‌ కీ బాత్ కార్య‌క్ర‌మ‌మే అంద‌రికీ గుర్తొస్తుంది. 1995-2004 మ‌ధ్య ప్ర‌జా స‌మ‌స్య‌ల‌ను నేరుగా తెలుసుకునేందుకు చంద్రబాబు `డయల్ యువర్ సీఎం` అనే కార్యక్రమాన్ని నిర్వ‌హించారు.
ఈ కార్యక్రమం స్ఫూర్తితోనే 2014లో ప్రధానిగా బాధ్యతలు చేపట్టిన న‌రేంద్ర మోదీ మన్కీ బాత్ ను ప్రారంభించారు. ఈ రేడియో కార్యక్రమం అనతి కాలంలోనే అత్యంత ప్రాచుర్యం పొందింది. మన్కీ బాత్ ద్వారా సామాజిక సమస్యలు, ప్రభుత్వ కార్యక్రమాలు, విశిష్ట వ్యక్తులపై మోదీ మాట్లాడుతూ ప్ర‌జ‌ల‌కు మరింత చేర‌వ‌వుతున్నారు.
అయితే డయల్ యువర్ సీఎం, మన్కీ బాత్ క‌ల‌యికగా `మీతో మీ చంద్రబాబు` అనే స‌రికొత్త కార్యక్రమానికి శ్రీ‌కారం చుట్టాల‌ని ఏపీ సీఎం భావిస్తున్నారు. ఈ క్యార‌క్ర‌మం ద్వారా చంద్రబాబు రాష్ట్ర ప్ర‌జ‌ల‌తో మ‌మేకం కానున్నారు. ప్ర‌జా సమస్యలు తెలుసుకునేందుకు ముఖాముఖి స‌మావేశాలు నిర్వ‌హించ‌నున్నారు. సంక్రాంతి నుంచి మీతో మీ చంద్రబాబు కార్యక్రమాన్ని ప్రారంభించే దిశగా చర్చలు జ‌రుగుతున్నాయి. ఆడియో, వీడియో రూపంలో ఈ కార్యక్రమాన్ని నిర్వహించే అవ‌కాశాలు బ‌లంగా ఉన్నాయ‌ని అంటున్నారు.
