మరికొద్ది నెలల్లో ఏపీలో అసెంబ్లీ ఎన్నికలు జరగబోతున్న నేపథ్యంలో అభ్యర్థుల ఎంపికపై టీడీపీ-జనసేన ఈ రోజు తొలి జాబితాను ప్రకటించబోతున్నాయి. టీడీపీ – జనసేన కూటమి దాదాపు 90 మందితో ఉమ్మడి అభ్యర్థుల తొలి జాబితాను విడుదల చేయబోతున్నారు. టీడీపీ తరఫున 75 మంది ఎమ్మెల్యేలు, జనసేన తరఫున 15 మంది అభ్యర్థుల పేర్లు ప్రకటించే అవకాశముందని తెలుస్తోంది. ఈ రోజు మాఘ పౌర్ణమి మంచి రోజు అని అభ్యర్థుల తొలి జాబితాను విడుదల చేయనున్నారు. చంద్రబాబు, పవన్ కల్యాణ్ ఇద్దరూ కలిసి సంయుక్తంగా తొలి జాబితాను విడుదల చేయబోతున్నారు. ఈ క్రమంలోనే ఉండవల్లిలోని చంద్రబాబు నివాసానికి పవన్ కల్యాణ్, అచ్చెన్నాయుడు, నక్కా ఆనందబాబు తదితర సీనియర్ నేతలు చేరుకున్నారు.
కుప్పం నుంచి చంద్రబాబు, భీమవరం నుంచి పవన్ కల్యాణ్, టెక్కలి నుంచి అచ్చెన్నాయుడు, మంగళగిరి నుంచి నారా లోకేశ్, హిందూపురం నుంచి బాలకృష్ణ, తెనాలి నుంచి నాదెండ్ల మనోహర్ లకు టికెట్ కన్ఫర్మ్ అయింది. ఈ క్రమంలోనే కొద్ది రోజులపాటు సినిమాలకు, షూటింగ్ కి బాలయ్య బ్రేక్ ఇవ్వబోతున్నారని తెలుస్తోంది. బాబి దర్శకత్వంలో నటిస్తున్న చిత్రం షూటింగ్ షెడ్యూల్ ఈ నెలాఖరుకు పూర్తి కావస్తున్న నేపథ్యంలో ఆ షెడ్యూల్ తర్వాత బాలయ్య షూటింగ్లకు విరామం ప్రకటించబోతున్నారట. ఎన్నికల ప్రచారంపై పూర్తిస్థాయిలో బాధ్యతలు చేపట్టేందుకే బాలయ్య ఈ నిర్ణయం తీసుకున్నారని తెలుస్తోంది.
