గణతంత్ర దినోత్సవం సందర్భంగా జగన్ పై జనసేనాని పవన్ కల్యాణ్ విమర్శలు గుప్పించిన సంగతి తెలిసిందే. పోలీసులంటే జగన్ కు గౌరవం లేదని, అటువంటి జగన్ కు పోలీసులు సెల్యూట్ చేయాల్సి వస్తోందని పవన్ దుయ్యబట్టారు. గతంలో, పులివెందుల స్టేషన్లో ఓ ఎస్సైని జగన్ కొట్టారని కూడా పవన్ షాకింగ్ ఆరోపణలు చేశారు. ఈ క్రమంలోనే పవన్ వ్యాఖ్యలపై మంత్రి బొత్స సత్యనారాయణ ఘాటుగా స్పందించారు.
గణతంత్ర దినోత్సవం నాడు ఎవరైనా పద్ధతిగా మాట్లాడతారని, కానీ సెలబ్రిటీ పార్టీ నేత సన్నాసి మాటలు మాట్లాడాడని పవన్ పై బొత్స విమర్శలతో విరుచుకుపడ్డారు. ఆ నేత పిచ్చెక్కినట్టు మాట్లాడుతున్నాడని, అందుకే, తాము కూడా అదే స్థాయిలో స్పందించక తప్పడంలేదని చెప్పారు. ఏమీ లేని ఆకు ఎగిరెగిరిపడుతుందని, ఇటువంటి భాష మాట్లాడుతూ భావితరాలకు ఏం సందేశం ఇవ్వాలనుకుంటున్నాడని బొత్స అన్నారు.
పవన్ దగ్గర బాగా డబ్బులున్నాయని, అందుకే, పెద్ద వాహనం కొన్నాడని ఎద్దేవా చేశారు. తనను అడ్డుకుంటే కొడతా, ఉగ్రవాదిని అయిపోతా అంటున్నాడని విమర్శించారు. దమ్ముంటే ఆపాలని పవన్ అంటున్నాడని, ఎవరిని బెదిరిస్తాడు? ఎవరిని కొడతాడు? అని బొత్స ప్రశ్నించారు. అసలు నిన్నెందుకు ఆపుతాం, నిన్నెందుకు అడ్డుకుంటాం…అని బొత్స అన్నారు.
ఒకవేళ పవన్ ఉగ్రవాది అయిపోతే చట్టం తన పని తాను చేసుకుపోతుందని బొత్స అన్నారు. వైసీపీ ప్రభుత్వం అణగారిన వర్గాలకు అండగా నిలుస్తోందని, అది చూసి పవన్ కు ఎందుకు బాధ? అని బొత్స ప్రశ్నించారు. పవన్ కు కేఏ పాల్ కు పెద్ద తేడా లేదని బొత్స ఎద్దేవా చేశారు. వాక్ స్వాతంత్ర్యం ఉందని ఎలా పడితే అలా మాట్లాడతారా అని మండిపడ్డారు. ఇలాంటి వాళ్లను చూస్తుంటే రాజకీయాలపైనే విరక్తి కలుగుతోందని బొత్స అన్నారు.
