కాంగ్రెస్ పార్టీని తిరిగి గాడినపెట్టేందుకు ‘భారత్‌ జోడో యాత్ర’ పేరిట పాదయాత్ర చేపట్టారు ఆ పార్టీ అగ్ర నేత రాహుల్ గాంధీ. క‌న్యాకుమారి నుంచి క‌శ్మీర్ వరకు ఈ యాత్ర సాగుతుంద‌ని తెలిపారు. ఈ క్రమంలోనే ఈ నెల 10న త‌మిళ‌నాడులోని క‌న్యాకుమారి ప్రాంతంలో దీనిని ప్రారంభించారు. ప్ర‌స్తుతం ఇది కేరళలో కొన‌సాగుతోంది. కొద్ది రోజులుగా కేరళలో యాత్రకు మంచి స్పందన వస్తోంది. ఈ క్రమంలోనే రాహుల్ గాంధీకి షాక్‌ తగిలింది.
భారత్‌ జోడో యాత్ర వల్ల రాష్ట్రంలో ట్రాఫిక్‌ ఇబ్బందులు తలెత్తుతున్నాయని, నియంత్రించాలంటూ కేరళ హైకోర్టులో పిటిషన్‌ దాఖలైంది. కేరళలో ఈ నెల 11వ తేదీన మొదలైన యాత్ర 18 రోజుల పాటు సాగనుంది. భారత్‌ జోడో యాత్రను రోడ్డుకు ఒకేవైపు ఉండేలా రెగ్యూలేట్‌ చేస్తూ ఆదేశాలు ఇవ్వాలని కోరారు పిటిషనర్‌, న్యాయవాది కే విజయన్‌. యాత్రను రోడ్డుకు ఒకవైపు అనుమతించి, రెండోవైపు ట్రాఫిక్‌ వెళ్లేలా చూడాలన్నా రు. భారత్‌ జోడో యాత్ర కారణంగా ఇటీవల జాతీయ రహదారిని నాలుగు గంటల పాటు మూసివేశారని తెలిపారు.
అంతేకాదు.. సామాన్య ప్రాయాణికులు తీవ్ర ఇబ్బందులు ఎదుర్కొన్నారని పిటిషన్‌లో పేర్కొన్నారు. అలా గే.. ఈ యాత్ర కోసం భారీగా పోలీసులను మోహరించారని, ఆ ఖర్చు మొత్తం కాంగ్రెస్ పార్టీ బరించాలని, ప్రజల సొమ్మును వినియోగించకుండా చూడాలని కోరారు. కేరళ ప్రజా రహదారుల చట్టం 2011ను ఈ యాత్ర ఉల్లంఘిస్తోందని సూచించారు. ఈ పిటిషన్‌పై గురువారం విచారణ జరిపే అవకాశాలు ఉన్నాయి.
ఈ నేప‌థ్యంలో కాంగ్రెస్ వాదులు.. అభిమానులు.. స‌హా ఈ యాత్రను ఆదినుంచి ఫాలో అవుతున్న నెటిజ‌న్లు కూడా.. దీనిని ఆస‌క్తిగా గ‌మ‌నిస్తున్నారు. ఈ వ్య‌వ‌హారంపై తీర్పు ఎలా ఉంటుంది? పాదయాత్రకు బ్రేక్ పడుతుందా? అని చ‌ర్చించుకుంటున్నారు. వాస్త‌వానికి గ‌తానికి భిన్నంగా.. పాదయాత్ర త‌ర్వాత.. రాహుల్‌కు ప్రాభ‌వం పెరిగింద‌నే చెప్పాలి. ఆయ‌న‌ను చూసేందుకు.. ఆయ‌న మాట‌లు వినేందుకు కూడా.. ప్ర‌జ‌లు త‌ర‌లివ‌స్తున్నారు. ఈ క్ర‌మంలో యాత్రకు బ్రేక్ ఇచ్చేలా.. కోర్టుకు వెళ్ల‌డంపై.. చ‌ర్చ జరుగుతోంది.
