వైసీపీ ఎంపీ మార్గాని భరత్ పై వైసీపీ రెబల్ ఎంపీ రఘురామకృష్ణరాజు సెటైర్లు వేసిన సంగతి తెలిసిందే. భరత్ ఏకచిత్ర నటుడు అంటూ రఘురామరాజు చేసిన కామెంట్స్ హాట్ టాపిక్ గా మారాయి. ఈ నేపథ్యంలోనే ఆ కామెంట్లపై మార్గాని భరత్ స్పందించారు. తాను అనుకుంటే హీరోగా 10 సినిమాల్లో నటించగలనని సంచలన వ్యాఖ్యలు చేశారు. సూపర్ స్టార్ అయ్యే సత్తా తనకుందని భరత్ షాకింగ్ కామెంట్స్ చేశారు.
తాను సినిమాలు చేస్తే జనం ఆదరిస్తారని, తన ఫేస్ గ్లామర్ అటువంటిదని సంచలన వ్యాఖ్యలు చేశారు. అవసరమైతే జగన్ అనుమతి తీసుకొని పది సినిమాల్లో హీరోగా నటిస్తానని చెప్పారు. రఘురామ నోరు అదుపులో అదుపులో పెట్టుకోవాలని హెచ్చరించారు. రఘురామ కామెడీ యాక్టర్ కి తక్కువ పనికిమాలిన యాక్టర్ కు ఎక్కువ అంటూ విమర్శించారు. లోకేష్ ఉత్తరకుమారుడని, ఆయనవి ఉత్తర ప్రగల్భాలని కామెంట్ చేశారు.
లోకేష్ ది యువగళమా…గందరగోళమా అన్నది ఆయన చుట్టూ ఉన్న వారికి కూడా అర్థం కావడం లేదని కామెంట్ చేశారు. దేశవ్యాప్తంగా అధిక ధరలు ఉన్నాయని, ఏపీలో మాత్రమే పెరిగినట్టుగా ప్రజలను తప్పుదోవ పట్టిస్తున్నారని మండిపడ్డారు. రాష్ట్రానికి ప్రత్యేక ప్యాకేజీ ఇచ్చినపుడు కేంద్ర మంత్రిగా ఉన్న అశోక్ గజపతిరాజు నిద్రపోతున్నారా అని నిలదీశారు. ఆయన హోదా కోసం ఎందుకు రాజీనామా చేయలేదని ప్రశ్నించారు.
ప్రత్యేక హోదా విషయంలో రాష్ట్రానికి టీడీపీ తీరని అన్యాయం చేసిందన్నారు. దేశంలోని పారిశ్రామిక దిగ్గజాలు విశాఖకు రావడం సహించలేకే విపక్షాలు విమర్శలు గుప్పిస్తున్నాయని భరత్ అన్నారు.
