హైదరాబాద్ శివారులోని అబ్దుల్లాపూర్ మెట్ లో కొద్దిరోజుల క్రితం జరిగిన నవీన్ దారుణ హత్య రాష్ట్రంలో సంచలనం రేపిన సంగతి తెలిసిందే. ఈ హత్య వెనుక హరికృష్ణతోపాటు అతడి ప్రియురాలు నిహారికా రెడ్డి కూడా ఉందన్న వార్త సంచలనం రేపింది. ఈ నేపద్యంలోనే తాజాగా ఈ కేసులో హరికృష్ణ సంచలన విషయాలు పోలీసులకు వెల్లడించినట్టుగా తెలుస్తోంది. నవీన్ ను అత్యంత కిరాతకంగా ఎందుకు చంపాల్సి వచ్చిందో హరికృష్ణ పోలీసులకు వెల్లడించాడు.
బీటెక్ సెకండియర్ నుంచి నవీన్ తనకు ఫ్రెండ్ అని, మొదట నిహారిక, నవీన్ ప్రేమించుకున్నారని చెప్పాడు. అయితే, ఆ తర్వాత వాళ్ళిద్దరికి బ్రేకప్ అయిందని, నిహారికకు ఆ సమయంలో తన ప్రపోజ్ చేస్తే ఓకే చెప్పిందని అన్నాడు. కానీ, ఆ తర్వాత కూడా నిహారికకు నవీన్ ఫోన్లు చేసి మెసేజ్ చేసి ఇబ్బంది పెట్టే వాడని, ఆ విషయం నిహారికకు నచ్చేది కాదని వెల్లడించాడు. అందుకే, నవీన్ ను చంపాలని మలక్ పేట డి మార్ట్ లో మూడు నెలల క్రితం చాకు, ప్లాస్టిక్ గ్లౌజులు కొన్నానని వెల్లడించాడు.
జనవరి 16 నే నవీన్ ను చంపాలని ప్లాన్ చేసినా అప్పుడు కుదరలేదని అన్నాడు. ఆ తర్వాత ఫిబ్రవరి 17న నవీన్ తనకు ఒంటరిగా దొరికాడని, అందుకే ఓఆర్ఆర్ దాటిన తర్వాత ఇద్దరం మద్యం సేవించి నిహారిక విషయంలో గొడవపడ్డామని అన్నాడు. నవీన్ గొంతు నులిమి చంపేసిన తర్వాత అతని శరీర భాగాలను కత్తితో ముక్కలుగా కోశానని వెల్లడించాడు. ఆ తర్వాత ఆ ముక్కలను బ్రాహ్మణపల్లి లోని రాజీవ్ గృహకల్ప వెనక పడేసి అక్కడ తన ఫ్రెండ్ హసన్ ఇంటికి వెళ్లానని చెప్పాడు.
ఆ తర్వాత తనను పోలీసులకు లొంగిపోవాలని హసన్ వారించాడని, ఆ తర్వాత తాను నవీన్ శరీర భాగాలను తీసుకువెళ్లి దహనం చేశానని అన్నాడు. చివరకు నిహారిక, హసన్చ తన తండ్రి అందరూ పోలీసులకు లొంగిపోవాలని చెప్పడంతో పోలీసులకు లొంగిపోయానని చెప్పాడు.
