భార్యాభర్తలన్న తర్వాత చిర్రుబుర్రులాడుకోవడం…గొడవ పడడం సహజం…కొన్ని గొడవలు నిమిషాల్లో ముగిస్తే..మరికొన్ని రోజులలో సద్దుమణుగుతుంటాయి. అయితే, ఇద్దరిలో ఎవరో ఒకరు చొరవ తీసుకొని…ఒక అడుగు వెనక్కి వేస్తేనే ఆలుమగల పంచాయతీ ముగిసేది. భార్య కోపాన్ని భర్త..భర్త అలకను తీర్చేందుకు భార్య నానా ప్రయత్నాలు చేస్తుంటారు. ఇలా అనుకొనే పిచ్చకోపంతో ఉన్న తన భార్యను కూల్ చేద్దామని ఓ భర్త ఆమెను ముద్దుపెట్టుకోబోయాడు. అయితే, అప్పటికే కోపం నషాళానికి అంటిన భార్య చేసిన పని షాకింగ్ గా మారింది. తన కోపాన్ని చల్లార్చేందుకు లిప్ కిస్ ఇవ్వబోయిన భర్త నాలుకను భార్య కొరికిన ఘటన ఏపీలో సంచలనం రేపింది.
కర్నూలు జిల్లా తుగ్గలి మండలం గుట్టతండాలో గుంటూరు జిల్లాకు చెందిన తారాచంద్ నాయక్, తుగ్గలి మండలానికి చెందిన పుష్పవతి నివాసం ఉంటున్నారు. 2015లో ప్రేమ పెళ్లి చేసుకున్న ఈ జంటకు ఇద్దరు సంతానం. కొంతకాలంగా భార్యాభర్తల మధ్య చిన్నచిన్న గొడవలు జరుగుతున్నాయి. తాజాగా మరోమారు గొడవ పడడంతో భార్య పుష్పవతికి ముద్దిచ్చి బుజ్జగిద్దామనుకున్నాడు తారా చంద్.
అప్పటికే భర్తపై కస్సుమంటున్న పుష్పవతి..బలవంతంగా ముద్దు పెట్టుకోబోయిన భర్తకు షాకిచ్చింది. తగ్గేదేలే అన్నరీతిలో ఫ్రెంచ్ కిస్ ఇవ్వబోయిన భర్త నాలుకను కొరికేసింది. దీంతో, తారాచంద్ ఉరుకులు పరుగుల మీద ఆసుపత్రికి పరిగెట్టాడు. మెరుగైన వైద్యం కోసం అనంతపురానికి తారా చంద్ ను తరలించారు వైద్యులు. తన భార్య మరో వ్యక్తితో సన్నిహితంగా ఉంటోందని తారచంద్ ఆరోపించాడు. ఆమె నుంచి తనకు ప్రాణహాని ఉందని ఆందోళన వ్యక్తం చేశాడు. బలవంతంగా ముద్దుపెట్టుకోవాలని ప్రయత్నించడంతోనే కొరికానని పుష్ప చెబుతోంది. దీంతో, భర్త తారాచంద్ పై పుష్పవతి పోలీసులకు ఫిర్యాదు చేసింది. దీంతో, ఈ ఘటనపై సోషల్ మీడియాలో కామెంట్లు వస్తున్నాయి. ఇకపై భార్యకు ముద్దిచ్చే ముందు మూడు సార్లు ఆలోచించాలని నెటిజన్లు కామెంట్లు చేస్తున్నారు. ముద్దంటే చేదే…అంటూ పాడుకుంటున్నారు.
