దేశ రాజధాని ఢిల్లీలో శ్రద్ధా వాకర్ దారుణ హత్య దేశవ్యాప్తంగా పెను దుమారం రేపిన సంగతి తెలిసిందే. ఆమె ప్రియుడు ఆఫ్తాబ్ చేతిలో శ్రద్ధా వాకర్ పాశవికంగా హత్యకు గురి కావడం సంచలనం రేపింది. శ్రద్ధను అత్యంత దారుణంగా హతమార్చిన ఆఫ్తాబ్…ఆమె శవాన్ని 35 ముక్కలు చేశాడు. ఆ తర్వాత మూడు వారాల పాటు ఆ ముక్కలను ఫ్రిజ్లో ఉంచి వేర్వేరు ప్రాంతాలలో సినీ ఫక్కీలో విసిరేశాడు. ఈ మర్డర్ పోలీసులను సైతం ఒళ్లు గగుర్పాటుకు గురయ్యేలా చేసింది. ఇద్దరి మధ్య మనస్పర్థలు రావడం, పెళ్లి చేసుకోవాలని తనను ఒత్తిడి చేయడంతోనే శ్రద్ధాను చంపేశానని ఆఫ్తాబ్ చెప్పాడు.
అయితే, విచారణలో భాగంగా ఆఫ్తాబ్ కు నిర్వహించిన నార్కో అనాలసిస్ టెస్టులో శ్రద్ధ హత్యకు సంబంధించి మరిన్ని షాకింగ్ విషయాలు వెల్లడయ్యాయి. అసలు శ్రద్ధ వాకర్ ను ఎందుకు చంపాడు అన్న కారణం బట్టబయలైంది. మరో యువకుడితో శ్రద్ధ వాకర్ కు అఫైర్ ఉందని, రాత్రంతా ఆ యువకుడితో శ్రద్ధా గడిపినందుకే ఆమెను దారుణంగా చంపేశానని ఆఫ్తాబ్ అంగీకరించడం సంచలనం రేపుతోంది. బంబుల్ డేటింగ్ యాప్ లో ఒక కుర్రాడితో శ్రద్ధకు పరిచయం ఏర్పడిందని, మే 17న గురుగ్రామ్ వెళ్లి అతడితో ఒక రాత్రంతా ఆమె గడిపిందని నార్కో టెస్ట్ లో ఆఫ్తాబ్ వెల్లడించాడు.
గురుగ్రామ్ వెళ్లిన మరుసటి రోజు మధ్యాహ్నం ఫ్లాట్ కు వచ్చిన శ్రద్ధతో తాను గొడవపడ్డానని, ఈ క్రమంలోనే మాట మాట పెరిగి క్షణికావేశంలో శ్రద్ధాను హత్య చేశానని ఆఫ్తాబ్ అంగీకరించాడు. ఆ విషయాలను పోలీసులు విచారణ జరిపి అవి వాస్తవాలని నిర్ధారించుకున్నారు. అయితే, ఆ యువకుడి వివరాలను సేకరించిన పోలీసులు అతడి పేరు మాత్రం బయట పెట్టలేదు.
మరోవైపు, విశాఖపట్నంలో కూడా వాకర్ హత్య తరహాలోనే మరో హత్య జరగడం ఆంధ్రప్రదేశ్ లో సంచలనం రేపింది. ధనలక్ష్మి అనే శ్రీకాకుళానికి చెందిన మహిళను రిషి అనే వ్యక్తి సహ జీవనం పేరుతో ఓ ఇంట్లో అద్దెకు ఉంచాడు. అయితే, ధన లక్ష్మి తనను డబ్బులు డిమాండ్ చేయడంతో రిషి ఆమె గొంతుకు చున్నీ బిగించి హత్య చేశాడు. ఆ తర్వాత శవాన్ని డ్రమ్ములో పెట్టి ఇంటికి తాళం వేసి పరారయ్యాడు. ఏడాది తర్వాత ఆ వ్యవహారం వెలుగులోకి రావడంతో అతడిని పోలీసులు అరెస్టు చేశారు.
