ఎంతైనా మ‌న హీరోలు వేరే రాష్ట్రాల్లో పాపులారిటీ సంపాదిస్తే.. మ‌న సినిమాలు ఇత‌ర ప్రాంతాల్లో ఇర‌గాడేస్తుంటే ఆ కిక్కే వేరుగా ఉంటుంది. బాహుబ‌లి సినిమా తెలుగు రాష్ట్రాల అవ‌త‌ల ఎలాంటి ప్ర‌భంజ‌నం సృష్టించిందో.. ప్ర‌భాస్‌కు ఏ స్థాయిలో గుర్తింపు వ‌చ్చిందో తెలిసిందే. ఆ త‌ర్వాత మ‌రే హీరో కూడా ఇలాంటి పాపులారిటీ సంపాదించాలేదు. వేరే సినిమాల‌కు ఇలాంటి ఆద‌ర‌ణా ద‌క్క‌లేదు. ఐతే బాహుబ‌లితో పోల్చ‌లేం కానీ.. ఇప్పుడు పుష్ప మూవీ తెలుగు రాష్ట్రాల అవ‌త‌ల మాంచి క‌లెక్ష‌న్లు రాబ‌డుతూ దూసుకెళ్తోంది. హిందీ, త‌మిళం, మ‌ల‌యాళ వెర్ష‌న్లు ఇప్ప‌టికే బ్రేక్ ఈవెన్ మార్కును దాటేసి లాభాల బాట ప‌ట్ట‌డం విశేషం.
ఈ సినిమా నార్త్ ఇండియాలో ఇంత‌గా ప్రేక్ష‌కుల దృష్టిని ఆక‌ర్షిస్తుండ‌టం విశేష‌మే. ఐదు రోజుల్లోనే రూ.20 కోట్ల‌కు పైగా గ్రాస్ క‌లెక్ట్ చేసి ఆశ్చ‌ర్య‌ప‌రిచింది పుష్ప హిందీ వెర్ష‌న్. బాలీవుడ్ ట్రేడ్ పండిట్లు ఆశ్చ‌ర్య‌పోతూ పుష్ప క‌లెక్ష‌న్ల ఫిగ‌ర్స్‌ను ప్ర‌క‌టిస్తున్నారు. పుష్ప విజ‌యాన్ని అక్ష‌య్ కుమార్ స‌హా కొంద‌రు బాలీవుడ్ స్టార్లు గుర్తించారు. ఇప్పుడు ఓ స్టార్ క్రికెట‌ర్ పుష్ప మేనియాకు ఫిదా అయి ఒక ఇన్‌స్టాగ్రామ్ రీల్స్ వీడియో కూడా చేశాడు. ఆ క్రికెట‌ర్ ఎవ‌రో కాదు.. ఆల్ రౌండ‌ర్ ర‌వీంద్ర జ‌డేజా. పుష్ప.. పుష్ప రాజ్.. దీనెవ్వ త‌గ్గేదే లే అనే పాపుల‌ర్ డైలాగ్‌ను ఇమిటేట్ చేస్తూ జ‌డేజా చేసిన వీడియో ఇప్పుడు ఇంట‌ర్నెట్లో వైర‌ల్ అవుతోంది.
హావ‌భావాల‌తో స‌హా బ‌న్నీని జ‌డేజా అనుక‌రించిన తీరు ఆక‌ట్టుకుంటోంది. పుష్ప నార్త్ ఇండియాలో ఎంత ప్ర‌భావం చూపిస్తోందో చెప్ప‌డానికి ఇది రుజువు. ఇంత‌కుముందు బ‌న్నీ న‌టించిన అల వైకుంఠ‌పుర‌ములో చిత్రంలోని బుట్ట‌బొమ్మ పాట ఇలాగే సెన్సేష‌న్ క్రియేట్ చేసింది. ఆ పాట‌కు ఎంతోమంది బాలీవుడ్ తార‌లు స్టెప్పులేశారు. ఇప్పుడు పుష్ప మూవీలో బ‌న్నీ మేన‌రిజ‌మ్స్ బాగా పాపుల‌ర్ అవుతున్న‌ట్లున్నాయి.
