ఈనాడు సంస్థల అధినేత, తెలుగు మీడియా మొఘల్ రామోజీరావు ఈ రోజు తుదిశ్వాస విడిచిన సంగతి తెలిసిందే. ఈ క్రమంలోనే ఒక సామాన్యుడిగా కెరీర్ మొదలు పెట్టిన రామోజీరావు ప్రపంచస్థాయిలో గుర్తింపు తెచ్చుకునే వరకు సాగించిన ప్రయాణం ఎంతోమందిని ఆశ్చర్యపరుస్తోంది. ఎక్కడో మారుమూల గ్రామంలో పుట్టిన ఆయన అకుంటిత దీక్షతో అంచెలంచెలుగా ఎదిగి తన వ్యాపార సామ్రాజ్యాన్ని విస్తరించిన వైనం ఎందరికో ఆదర్శప్రాయం. ముఖ్యంగా అక్షరాలతో రామోజీ రావు చేసిన ప్రయాణం తెలుగు మీడియాలో మరెవరూ చేసి ఉండరంటే అతిశయోక్తి కాదు. ఆయన రాసేది తక్కువే అయినా..రాయించేది ఎక్కువే. అందుకే, ‘జర్నలిస్టు’లతో రామోజీ రావు అక్షరాల ‘జర్నీ’ ఎంతో ఆసక్తికరం…మరెందరికో స్ఫూర్తిదాయకం!
_ఆయన రాసేది తక్కువే..!_
_రాయించేది ఎక్కువ..!_
_అలా రాయించేటపుడు జంకడు..!_
_బెదరింపులు రానీ..!_
_ఒత్తిడులు పెరగనీ..!_
_దాడులే జరగనీ…!_
_రాయిలా నిలబడి రాయిస్తూనే ఉన్నాడు..!_
_అలా అక్షరయాత్ర సాగించి..!_
_అనుకున్నవి ఎన్నో సాధించి..!_
_ఒక మహాక్రతువును ముగించి..!_
_విజయగర్వంతో అక్షరమాల ధరించి దివికేగాడు..!_
_మూత పడని ఆ పెన్ను..!_
_అవినీతిపై ఈనాడు పేరిట ఏనాడో ఎక్కుపెట్టిన గన్ను..!_
_అక్షరమే ఆయుధమై..!_
_సమాజహితంలో తానే ఒక సమిధయై..!_
_ఎక్కడో పుట్టినా వార్త..!_
_రామోజీరావు దాని కర్త..!_
_ఆ వార్తకు సంస్కర్త..కృతిభర్త..!_
_ఇలా ఉంటే అది వ్యాసమని..!_
_అలా చదవడమే పాఠకుని వ్యాసంగమని..!_
_నిర్వచించి..అదే ప్రవచించి..!_
_అలాగే రాయించి..!_
_పత్రికకి ప్రమాణం..!_
_నిర్దేశించిన చారిత్రక ప్రయాణం..!_
_నీ ఆసక్తి..నా అనురక్తి..!_
_రామోజీరావు యుక్తి..!_
_తెలుగు భాషకు ఈనాడు ప్రథమావిభక్తి..!_
_చదివేవాడికి రక్తి..ఎందరికో భుక్తి..!_
_ఈనాడు మూలవిరాట్టు..!_
_ఆధునిక మీడియా సామ్రాట్టు..!_
_పట్టిందే పట్టు..విడిచిపెడితే ఒట్టు..!_
_పోరాటమే పధం..అక్షరమే ఆయుధం..!_
_ఈనాడే పాశుపతం..!_
_అదే రామబాణం..అదే సుదర్శనం..!_
_ప్రతి ఉదయం సంచలనంతో దర్శనం..!_
_రామోజీ ధైర్యానికి ఆ పత్రికే నిదర్శనం..!_
_ఈనాడు ఒక వ్యసనం..ఒక శాసనం..!_
_పాఠకుడికి ఏకాసనం..అధినేతకు సింహాసనం..!_
_సామాన్యంగా మొదలైన సినిమా ప్రయాణం..!_
_”*ఉషాకిరణ్..తిమిర సంహరణాలు”*..!_
_అదీ ఒక చరిత్రే..!_
_ఆయన సినిమాలూ అవకరాలకు ప్రతిఘటనే..!_
_*”ఫిలిం సిటీ”* రామోజీ కీర్తి కిరీటంలో మరో కలికితురాయి..!_
_బాలీవుడ్ సైతం చూడని మరో ప్రపంచం..!_
_హాలీవుడ్ స్థాయి సంచలనం..!_
_ఇలాంటి ఎన్నో అపురూపాలతో సదా అద్భుతాలతో రామోజీరావు కరచాలనం..!_
_పత్రికా రంగానికి ఆయనే మార్గదర్శి..!_
_అక్షరానికి బలం..!_
_వార్తకు శక్తి..రాతకు ఉన్నతి..!_
_పత్రికకు గౌరవం..!_
_ప్రచురణకు సాంకేతికత..!_
_పాఠకుడికి ఉత్సుకత..!_
_ఇవన్నీ రామోజీరావు భావుకత..!_
