సింగర్ సునీత గురించి తెలుగు ప్రేక్షకులకు, సంగీత అభిమానులకు ప్రత్యేకంగా పరిచయం అక్కర లేదు. నేపథ్య గాయనిగా, డబ్బింగ్ ఆర్టిస్ట్ గా, మ్యూజికల్ షోలకు జడ్జిగా సునీత రాణిస్తున్న సంగతి తెలిసిందే. ఇటీవల, మ్యాంగో వీడియోస్ అధినేత రామ్ వీరపనేనిని పెళ్లి చేసుకున్న సునీత తన జీవితంలో సెకండ్ ఇన్నింగ్స్ మొదలుపెట్టారు. ఈ నేపథ్యంలోనే సునీత తన భర్తతో కలిసి ఓ కొత్త బిజినెస్ స్టార్ట్ చేయబోతున్నారని పుకార్లు వస్తున్నాయి.
తన భర్త రామ్ తో కలిసి వెబ్ సిరీస్ నిర్మాణ రంగంలోకి సునీత అడుగుపెట్టబోతున్నారని కొద్ది రోజులుగా మీడియా, సోషల్ మీడియాలో ప్రచారం జరుగుతోంది. ఆల్రెడీ రామ్ నిర్వహిస్తోన్న వెబ్ సిరీస్, షోల నిర్మాణ బాధ్యతలు సునీత చూసుకుంటారని ఊహాగానాలు వినిపిస్తున్నాయి. మరోవైపు, రామ్ నిర్మించబోయే వెబ్ సిరీస్ లో సునీత నటిస్తున్నారంటూ మరో ప్రచారం జోరుగా జరుగుతోంది. ఈ క్రమంలోనే తాజాగా ఆ ప్రచారంపై సునీత స్పందించారు.
సోషల్ మీడియాలో జరుగుతున్న ప్రచారంలో నిజం లేదని సునీత క్లారిటీ ఇచ్చారు. ప్రస్తుతం సంగీతరంగంలో తాను ఎంతో ఆనందంగా ఉన్నానని, ఇక్కడే మరో మెట్టు ఎక్కడానికి ప్రయత్నిస్తానని వెల్లడించారు. మరోవైపు అడుగులు వేసే ఆలోచన లేదని సునీత క్లారిటీ ఇచ్చారు. గతంలో కూడా సునీత సినిమాల్లో నటిస్తారనే పుకార్లు వచ్చిన సంగతి తెలిసిందే.
