‘మాతో ఉంటూ ప్రత్యర్థులకు పని చేసేవాడు మావాడైన పరాయివాడే.. మాతో నిలబడేవాడు పరాయివాడైన మావాడే’ అంటూ మూడు రోజుల క్రితం జనసేన నేత, మెగా సోదరుడు నాగబాబు ట్వీట్ చేసిన విషయం తెలిసిందే. ఈ ట్వీట్ జనసేన వర్గాలతో పాటు అల్లు ఫ్యామిలీ, మెగా ఫ్యామిలీలో కలకలం రేపింది. బన్నీ ఫ్యాన్స్ ట్రోలింగ్ దెబ్బకు నాగబాబు ఎక్స్ ఖాతా డీయాక్టివేట్ చేశారు. అయితే, తాజాగా నాగబాబు మరో ట్వీట్ తో తన ఎక్స్ ఖాతాను యాక్టివేట్ చేశారు. తాను ఆ ట్వీట్ డిలీట్ చేశానని నాగబాబు అన్నారు. దీంతో, అల్లు అర్జున్ ను ఉద్దేశించి నాగబాబు ట్వీట్ చేశారని కన్ఫర్మ్ అయినట్లయింని ట్రోలింగ్ జరుగుతోంది.
ఎన్నికల ప్రచారం చివరి రోజున వైసీపీ నుండి నంధ్యాల ఎమ్మెల్యేగా పోటీ చేస్తున్న తన స్నేహితుడు శిల్పా రవిచంద్రారెడ్డికి మద్దతుగా అల్లు అర్జున్ నంధ్యాలకు వెళ్లాడు. ఒకవైపు వైసీపీకి వ్యతిరేకంగా పిఠాపురం నుండి జనసేన అధినేత, మేనమామ పవన్ కళ్యాణ్ పోటీ చేస్తుండగా, అల్లు అర్జున్ నంద్యాలకు వెళ్లడం కలకలం రేపింది. అయితే పార్టీలకు అతీతంగా కేవలం ఇచ్చిన మాట ప్రకారం వెళ్లాను అని అల్లు అర్జున్ వివరణ ఇచ్చాడు.
పవన్ ఫ్యాన్స్, జనసేనలో ఈ పర్యటన ఆ రోజే కలకలం రేపింది. ఈ నేపథ్యంలో ఎన్నికల తర్వాత నాగబాబు చేసిన ట్వీట్ మరింత కలకలం రేపింది. ఈ ట్వీట్ మీద అల్లు అర్జున్ అభిమానుల నుండి తీవ్ర కామెంట్లు వచ్చాయి.
