టీడీపీ అధినేత చంద్రబాబు వయసు ఏడు పదుల వయసులో కూడా ఏ మాత్రం అలసి పోకుండా ఎన్నికల ప్రచారంలో హుషారుగా పాల్గొన్న సంగతి తెలిసిందే. నిప్పుల కొలిమిలా మారిన ఆంధ్రప్రదేశ్ రాష్ట్రం నలుమూలలా నడి వేసవి మండుటెండను కూడా లెక్క చేయకుండా చంద్రబాబు బహిరంగ సభలు, రోడ్ షోలు, సమావేశాలతో బిజీబిజీగా గడిపారు. దాదాపు రెండు నెలల పాటు క్షణం తీరిక లేకుండా తన ఆరోగ్యాన్ని కూడా లెక్కచేయకుండా చంద్రబాబు తన ప్రాణం పెట్టి మరీ ఎన్నికల ప్రచారం చేశారు. ఎన్నికలు పూర్తయిన నేపథ్యంలో తాజాగా చంద్రబాబు సతీసమేతంగా అమెరికా వెళ్లారు.
తన సతీమణి భువనేశ్వరితో కలిసి హైదరాబాద్ నుంచి అమెరికా పయనమయ్యారు. చంద్రబాబు విశ్రాంతి తీసుకునేందుకు అమెరికా వెళ్లారు అని టాక్. అయితే వైద్య పరీక్షల కోసం ఆయన అమెరికా వెళ్లారని మరో ప్రచారం జరుగుతోంది. గతంలో అమెరికాలో వైద్య పరీక్షలు చేయించుకున్న చంద్రబాబు మరోసారి చెకప్ కోసం వెళ్లారని తెలుస్తోంది. ఐదారు రోజుల్లో ఆయన తిరిగి హైదరాబాద్ చేరుకుంటారని తెలుస్తోంది.
వారణాసిలో ప్రధాని మోడీ నామినేషన్ కార్యక్రమంలో పాల్గొన్న తర్వాత చంద్రబాబు సతీసమేతంగా మహారాష్ట్రలోని పలు పుణ్యక్షేత్రాలు సందర్శించిన సంగతి తెలిసిందే. కాగా, టీడీపీ జాతీయ ప్రధాన కార్యదర్శి నారా లోకేశ్ ఆల్రెడీ బ్రాహ్మణి, దేవాన్ష్ లతో కలిసి అమెరికా వెళ్లారు. ఇక, ఏపీ సీఎం జగన్ కూడా కుటుంబ సమేతంగా లండన్ టూర్ లో ఉన్న సంగతి తెలిసిందే.
