విజయవాడలో కొద్ది రోజుల క్రితం జరిగిన ఎన్టీఆర్ శత జయంతి వేడుకల సందర్భంగా తమిళ సూపర్ స్టార్ రజనీకాంత్ చేసిన కామెంట్లపై వైసీపీ నేతలు విమర్శలు గుప్పించిన సంగతి తెలిసిందే. ఈ నేపథ్యంలోనే ఆ వ్యవహారంపై స్పందించాలని ప్రముఖ సినీ నటుడు మంచు మోహన్ బాబును మీడియా ప్రతినిధులు కోరిన వైనం హాట్ టాపిక్ గా మారింది. అయితే, ఆ వ్యవహారంప స్పందించేందుకు మోహన్ బాబు నిరాకరించారు.
తనకు రజనీకాంత్ మంచి మిత్రుడని, ఆ వ్యవహరంపై సాయంత్రం వరకు మాట్లాడినా టైం సరిపోదని అన్నారు. తాను వివాదాల జోలికి వెళ్లబోనని, కాంట్రవర్సీల వల్ల లాభం లేదని చెప్పారు. తిరుమల శ్రీవారిని మోహన్ బాబు దర్శించుకున్న అనంతరం మీడియాతో మాట్లాడుతూ ఈ వ్యాఖ్యలు చేశారు. నైవేద్య విరామ సమయంలో స్వామి వారి సేవలో పాల్గొన్న మోహన్ బాబు… శ్రీవారికి మొక్కులు చెల్లించారు.
రంగనాయకుల మండపంలో వేద పండితులు మోహన్ బాబుకు వేద ఆశీర్వాదం అందించారు.
ఈ ఏడాది తొలిసారిగా శ్రీనివాసుడి దర్శనం అద్భుతంగా జరిగిందని మోహన్ బాబు అన్నారు. మోహన్ బాబు విశ్వవిద్యాలయం వచ్చిందని, దేశంలోనే నంబర్ వన్ యూనివర్సిటీగా దానిని తీర్చిదిద్దుతామని చెప్పారు. త్వరలో రూ.100 కోట్ల వ్యయంతో భారీ బడ్జెట్ సినిమా ఒకటి నిర్మిస్తున్నానని ఆ చిత్ర వివరాలను మంచు విష్ణు త్వరలో వెల్లడిస్తారని చెప్పారు.
