రేవంత్ స్నేహంపై కోమటిరెడ్డి ‘సలార్’ పోస్టు

నిత్యం తన పోస్టులతో యమా యాక్టివ్ గా ఉంటారు తెలంగాణ రాష్ట్ర మంత్రి కోమటిరెడ్డి వెంకటరెడ్డి. ఈ మధ్యన ఉప ముఖ్యమంత్రి భట్టితో కలిసి ఉన్న పోస్టు పెట్టిన వేళ.. దానిపై గులాబీ బ్యాచ్ చేస్తున్న ప్రచారానికి తన తాజా పోస్టుతో బలమైన సందేశాన్ని పంపటం ఆసక్తికరంగా మారింది. బాక్సాఫీస్ వద్ద రికార్డు కలెక్షన్లతో దూసుకెళుతున్న డార్లింగ్ ప్రభాస్ నటించిన ‘సలార్’ మూవీలో స్నేహంపై ఉన్న పాటను బ్యాక్ డ్రాప్ గా తీసుకొని.. సీఎం రేవంత్ తో తనకున్న స్నేహాన్ని తెలియజేసేలా మంత్రి కోమటిరెడ్డి తయారు చేసిన వీడియో సాంగ్ ఇప్పుడు వైరల్ గా మారింది.

‘కంచె ఒకడైతే.. అది మించె వాడొకడే అన్న మాటకు కంచె తానుగా.. దానికి మించే రేవంత్ గా పేర్కొన్నారు. ఒకడు చిచ్చురా.. మరొకరు తెమ్మెరగా పదానికి తాను చిచ్చురాగా కోమటిరెడ్డి పేర్కొన్నారు. కలిసి దహనాలే అంటూ పాటకు కంటిన్యూగా వేగం ఒకడు.. త్యాగం ఒకడు అంటూ వేగానికి రేవంత్.. త్యాగానికి తానుగా పేర్కొంటూ తమ స్నేహం కలకాలం సాగుతుందన్న ఆకాంక్షను వ్యక్తం చేశారు.

ఒకరికొరని నమ్మి నడిచిన స్నేహం ఇదేలే.. నూరేళ్లు నిలవాలే..అంటూ సాగే బ్యాక్ డ్రాప్ పాటకు తగ్గట్లు ఇరువురు ఒకరి మెడలో మరొకరు పార్టీ కండువా వేసిన వైనం.. ఇరువురు కలిసి కట్టుగా ఉన్న వీడియోను షేర్ చేశారు. ఈ వీడియోతో భట్టితో తాను జట్టు కట్టినట్లుగా గులాబీ పార్టీ నేతలు చేస్తున్న ప్రచారానికి చెక్ చెబుతూ.. సీఎం రేవంత్ తో తనకున్న అనుబంధాన్ని తెలియజేసేలా పెట్టిన పోస్టు ఇప్పుడు వైరల్ గా మారింది.

అయితే.. ఇదంతా డ్యామేజ్ కంట్రోల్ లో భాగంగా కోమటిరెడ్డి పెట్టిన పోస్టుగా బీఆర్ఎస్ వర్గం వ్యాఖ్యలు చేస్తుంటే.. చక్కగా కలిసిపోయి.. స్నేహంగా ఉంటే భరించలేక నిప్పులు పోసుకునేలా కామెంట్లు చేస్తున్నారంటూ కాంగ్రెస్ వర్గీయులు మండిపడుతున్నారు. ఏమైనా.. కోమటిరెడ్డి నుంచి వచ్చిన సలార్ పోస్టు కాంగ్రెస్ వర్గీయుల్ని తెగ ఆనందానికి గురి చేస్తుంది. మీరిద్దరు ఇలానే ఉండాలంటూ తమ అభిలాషను వ్యక్తం చేస్తుండటం గమనార్హం.

వేగమొకడు… త్యాగమొకడు
గతము మరువని గమనమే.

ఒకరినొకరు నమ్మి నడిచిన బంధమే ఇదిలే

ఒకరు గర్జన… ఒకరు ఉప్పెన
వెరసి ప్రళయాలే.

సైగ ఒకరు… సైన్యం ఒకరు
కలిసి కదిలితే కదనమే…#AdminPost #KomatiReddyVenkatReddy #RevanthReddy #TelanganaPrajaPrabhutwam @revanth_anumula @INCTelangana pic.twitter.com/BPNdM4LuRZ

— Komatireddy Venkat Reddy (@KomatireddyKVR) December 31, 2023