ఒక్కొక్కరికి ఒక్కో అభిరుచి ఉంటుంది. హైదరాబాద్ లోని పాతబస్తీకి చెందిన 37 ఏళ్ల నసీర్ ఖాన్ కు ఖరీదైన కార్లు కొనటం మహా ఇష్టం. అతగాడు తాజాగా కొన్న కారు విలువ ఎంతో తెలుసా? అక్షరాల రూ.12 కోట్లు. సదరు కారు ఇప్పటికి దేశంలో రెండు మాత్రమే ఉన్నాయి. అందులో ఒక దానికి యజమాని నసీర్. పాతబస్తీకి చెందిన నసీర్ ఖాన్ కు కార్ల కలెక్షన్ అంటే చాలా మోజు. అతగాడు మనసు లాగిందంటే అదెంత ఖరీదైనా సరే కొనేసి.. తన ఇంట్లో పెట్టుకోవటం అతనికి అలవాటు.
ఇంతకీ అంత ఖరీదైన కారు మరేదో కాదు మెక్ లారెన్ 765 ఎల్ టీ. మూడు రోజుల క్రితమే సదరు కారును ప్రత్యేకంగా హైదరాబాద్ కు తీసుకొచ్చిన కంపెనీ ప్రతినిధులు ఆయనకు అందజేశారు. దీంతో.. ఒక్కసారిగా నసీర్ ఖాన్ వార్తల్లో వ్యక్తిగా మారారు. కారు కొనటం కూడా వార్తేనా? అంటే.. దాని విలువ రూ.12 కోట్లు అన్నది ఇక్కడ కీలకమన్నది మర్చిపోకూడదు.
పాతబస్తీకి చెందిన ప్రముఖ వ్యాపారి కుమారుడైన నసీర్ ఖాన్ వద్ద బోలెడన్ని ఖరీదైన కార్లు ఉంటాయని చెబుతారు.
అతగాడు ఇంట్లో నుంచి కారులో బయటకు వస్తే.. అక్కడి రోడ్ల మీద ఉన్న వారు ఎవరైనాసరే.. కాస్తంత ఆగి అతడి కారును చూస్తారట. ఎందుకంటే.. అలాంటి ఖరీదైన కార్లు చాలా అరుదుగా కనిపించటమేనని చెబుతారు. నసీర్ ఖాన్ కొనుగోలుచేసిన రూ.12 కోట్ల కారు దేశం మొత్తమ్మీదా రెండు మాత్రమే ఉన్నాయని చెబుతున్నారు. ఒకటి కోల్ కతాకు చెందిన వ్యక్తి సొంతం చేసుకుంటే.. రెండోది నసీర్ ఖాన్ వద్ద ఉంది. ఇతగాడు షేర్ చేసిన కార్ల ఫోటోలు సోషల్ మీడియాలో విపరీతంగా వైరల్ గా మారాయి.
