దర్శక ధీరుడు రాజమౌళి తెరకెక్కించిన ‘ఆర్ఆర్ఆర్’ సినిమా ప్రపంచవ్యాప్తంగా ఆదరణ పొందిన సంగతి తెలిసిందే. ఈ సినిమాలో తారక్, చెర్రీల పెర్ఫార్మెన్స్ కు, రాజమౌళి దర్శకత్వ పటిమకు హాలీవుడ్ దర్శకులతో పాటు క్రిటిక్స్ కూడా మంత్రముగ్దులయ్యారు. ఈ క్రమంలోనే గోల్డెన్ గ్లోబ్ అవార్డుతోపాటు హాలీవుడ్ క్రిటిక్స్ అసోసియేషన్ అవార్డులనూ ఈ సినిమా సొంతం చేసుకుంది.
బెస్ట్ స్టంట్స్, బెస్ట్ యాక్షన్ మూవీ, బెస్ట్ ఒరిజినల్ సాంగ్ (నాటు నాటు), బెస్ట్ ఇంటర్నేషనల్ ఫిల్మ్, హెచ్సీఏ స్పాట్ లైట్ (విదేశాల్లో సైతం విశేష ప్రేక్షకాదరణ పొందిన చిత్రం) అవార్డులను ఆర్ఆర్ఆర్ దక్కించుకుంది. ఇక, ప్రతిష్టాత్మక స్పాట్ లైట్ అవార్డును రామ్ చరణ్ అందుకున్నాడు. ఇక, క్రిటిక్స్ ఛాయిస్ బెస్ట్ యాక్టర్ ఇన్ యాక్షన్ మూవీ అవార్డుకు చరణ్ తో పాటు జూనియర్ ఎన్టీఆర్ కూడా నామినేట్ అయ్యారు. నికోలస్ కేజ్, టామ్ క్రూస్, బ్రాడ్ పిట్ వంటి లెజెండ్స్ తో తారక్, చెర్రీలు పోటీపడుతున్నారు.
అయితే, ఈ అవార్డుల కార్యక్రమంలో రామ్ చరణ్ సందడి చేయడం, స్పాట్ లైట్ అవార్డును అందుకోవడంతో తారక్ అభిమానులు సోషల్ మీడియాలో తమ అసంతృప్తిని వెళ్లగక్కారు. ఎన్టీఆర్ ను పట్టించుకోలేదని, ఏకపక్షంగా వ్యవహరించిందని హెచ్ సీఏపై వారు మండిపడుతున్నారు. ఈ క్రమంలోనే ఈ వ్యవహారంపై హాలీవుడ్ క్రిటిక్స్ అసోసియేషన్ స్పందించింది. ఈ అవార్డుల కార్యక్రమానికి తాము తారక్ ను కూడా ఆహ్వానించామని, కానీ, ఇండియాలో షూటింగ్ లో బిజీగా ఉన్నందున తారక్ రాలేకపోయారని ట్వీట్ చేసింది. త్వరలోనే అవార్డులను తారక్ కు అందజేస్తామని వివరణనిచ్చింది. తాజాగా హెచ్ సీఏ ఇచ్చిన క్లారిటీతో తారక్ అభిమానులు ఫుల్ జోష్ లో ఉన్నారు.
