తెలంగాణ బీజేపీ అధ్యక్షుడిగా బండి సంజయ్ ను తొలగించిన బీజేపీ హై కమాండ్…ఆ స్థానంలో కిషన్ రెడ్డిని నియమించిన సంగతి తెలిసిందే. దీంతో, బీజేపీ జాతీయ స్థాయిలో బండి సంజయ్ కు కీలక పదవి ఇచ్చే అవకాశముందని ప్రచారం జరుగుతోంది. ఆ ప్రచారానికి తగ్గట్లుగానే తాజాగా బండి సంజయ్ కు పార్టీ హైకమాండ్ కీలక బాధ్యతలను అప్పగించింది. బీజేపీ జాతీయ కార్యవర్గంలో బండికి చోటు కల్పించింది. బీజేపీ జాతీయ ప్రధాన కార్యదర్శిగా బండిని నియమించింది.
ఇక, బీజేపీ జాతీయ ఉపాధ్యక్షురాలిగా డీకే అరుణను కొనసాగించింది. ఏపీకి చెందిన బీజేపీ నేత సత్య కుమార్ కు జాతీయ కార్యదర్శిగా కొనసాగిస్తూ ఉత్తర్వులు జారీ చేసింది. సంజయ్ కు జాతీయ స్థాయిలో బాధ్యతలను అప్పగించడంపై బండి అనుచరులు హర్షం వ్యక్తం చేస్తున్నారు. పార్టీకి సంజయ్ చేస్తున్న సేవలను గుర్తించిన బీజేపీ పెద్దలు ఆయనకు సముచిత స్థానం కల్పించారని అంటున్నారు.
మరోవైపు, ప్రముఖ సినీ నటి, మాజీ ఎమ్మెల్యే జయసుధ బీజేపీలో చేరబోతు్ననారంటూ ప్రచారం జరుగుతోంది. బీజేపీ రాష్ట్ర అధ్యక్షుడు కిషన్ రెడ్డితో జయసుధ భేటీ కావడం ప్రాధాన్యతను సంతరించుకుంది. బీజేపీలో చేరేందుకు జయసుధ గతంలోనూ చర్చలు జరిపినట్లు ప్రచారం జరిగింది. ఆ చర్చల తర్వాత అటు బీజేపీ కానీ ఇటు జయసుధ కానీ ఎలాంటి వివరాలు వెల్లడించలేదు.
