అనసూయ గురించి తెలుగు ప్రేక్షకులకు పరిచయం అక్కర్లేదు. జబర్దస్త్ యాంకర్ గా కెరీర్ మొదలుబెట్టిన అనసూయ అనతికాలంలోనే టాలీవుడ్ లో మంచి నటిగా గుర్తింపు తెచ్చుకున్నారు. ఇక తన డ్రెస్సింగ్ పై, ఫోటోషూట్ ల పై జరుగుతున్న ట్రోలింగ్ కు దీటుగా జవాబిస్తూ అనసూయ తన కెరీర్ లో ముందుకు వెళుతున్నారు. ఇక, రాజకీయాలకు దూరంగా ఉండే అనసూయ తాజాగా ఏపీ రాజకీయాలపై చేసిన కామెంట్లు హాట్ టాపిక్ గా మారాయి.
జనసేన అధినేత పవన్ కళ్యాణ్ పిలిస్తే ఆయన తరఫున కచ్చితంగా ఎన్నికల ప్రచారం చేస్తానని అనసూయ చేసిన ప్రకటన సంచలనం రేపుతోంది. వాస్తవానికి తనకు రాజకీయాలపై ఆసక్తి లేదని అనసూయ చెప్పారు. అయితే, తనకు పార్టీలు ముఖ్యం కాదని నాయకులు ముఖ్యమని, నాయకుల ఎజెండా నచ్చితే వారికి కచ్చితంగా మద్దతిస్తానని అన్నారు. తన మాట వినే వారు కొంతమంది ఉండడం తన అదృష్టమని చెప్పుకొచ్చారు.
డేట్స్ కుదరకపోవడం వల్లే జబర్దస్త్ షోకు వెళ్లడం లేదని చెప్పుకొచ్చారు. అయితే, తనకు వీలు కుదిరినప్పుడల్లా జబర్దస్త్ సెట్స్ కు వెళుతుంటానని అన్నారు. గతంలో తనపై కోటా శ్రీనివాసరావు చేసిన వ్యాఖ్యలపై కూడా ఆమె స్పందించారు. కోటా గారు కొంచెం పాతకాలం మనిషని, తన డ్రెస్సింగ్ స్టైల్ నచ్చడం లేదని ఆయన అన్నారని గుర్తు చేసుకున్నారు. తనపై ఆయనకున్న చనువుతోనే ఆ వ్యాఖ్యలు చేశారని, దాన్ని పట్టుకుని కొంతమంది రకరకాలుగా రాశారని ఆగ్రహం వ్యక్తం చేశారు. తనను తన ఇంట్లో మనిషిగా కోటా గారు భావించారు కాబట్టే అలా వ్యాఖ్యానించారని అన్నారు. మరి అనసూయ బంపర్ ఆఫర్ ను పవన్ యాసెప్ట్ చేస్తారా లేదా అన్నది ఆసక్తికరంగా మారింది.
