మరాఠీలకు ప్రత్యేక రిజర్వేషను అంశాన్ని సుప్రీంకోర్టు పూర్తిగా కొట్టివేసింది. ఈ సందర్భంగా చేసిన వ్యాఖ్యలు ఏపీలో కాపులకు కూడా షాకింగే. ఎందుకంటే ఏ రూపంలో 50 శాతం రిజర్వేషన్లు దాటకూడదని సుప్రీం సంచలన తీర్పు ఇచ్చింది. అదే సమయంలో అగ్రకుల పేదలకు ఇచ్చే రిజర్వేషన్లు కూడా ఏ ఒక్క కులానికో పరిమితం చేయకూడదని ఖరాకండిగా తేల్చిచెప్పింది.
గతంలో మరాఠాలకు విద్య, ఉద్యోగాల్లో 12 శాతం రిజర్వేషన్లు ఇస్తూ మహరాష్ట్ర ప్రభుత్వం ఇచ్చిన ఉత్తర్వులను కొట్టివేసింది. మరాఠా రిజర్వేషన్లు.. రాజ్యాంగ విరుద్ధమని స్పష్టం చేసింది.
కేంద్రం కొత్తగా పది శాతం రిజర్వేషన్లను.. ఆర్థిక, సామాజిక వెనుకబాటుతనం ఆధారంగానే ఇచ్చిందన్న సుప్రీం ధర్మాసనం 50 శాతం రిజర్వేషన్ పరిమితి నిర్ణయంపై పునఃపరిశీలన అవసరం లేదని తేల్చిచెప్పింది. ఇందిరా స‌హానీ కేసులో 50 శాతం రిజర్వేషన్లపై ఇచ్చిన తీర్పును సమీక్షించేందుకు కూడా నో చెప్పింది.
దీనిని విస్తృత ధర్మాసనానికి సిఫార్సు చేయాల్సిన అవసరం లేదని జస్టిస్‌ అశోక్‌ భూషన్‌ నేతృత్వంలోని ఐదుగురు సభ్యుల ధర్మాసనం తేల్చిచెప్పింది. మరాఠా రిజర్వేషన్లను సమర్థిస్తూ, బాంబే హైకోర్టు తీర్పును సవాలు చేస్తూ పలు పిటిషన్లు దాఖలు కాగా.. వాటిపై అత్యున్నత న్యాయస్థానం తాజాగా తీర్పు వెలువరించింది.
మరాఠా రిజర్వేషన్లు సమానత్వ సూత్రాన్ని ఉల్లంఘించాయని స్పష్టం చేసింది. అదేస‌మ‌యంలో అగ్ర‌వ‌ర్ణ రిజర్వేషన్లు అంటే.. ఇష్టానుసారం ఇచ్చేవి కావ‌ని.. ఏ ఒక్క సామాజిక వ‌ర్గానికి పూర్తిగాను.. లేదా యాభై శాతం చొప్పున ఇచ్చే అధికారం రాజ‌కీయ కోణంలోనే చూడాల్సి ఉంటుంద‌ని వ్యాఖ్యానించ‌డం గ‌మ‌నార్హం.
