మాజీ మంత్రి కేటీఆర్ ను పొలిటికల్ గా విమర్శించే క్రమంలో మంత్రి కొండా సురేఖ చేసిన వ్యాఖ్యలు వివాదానికి దారి తీసిన సంగతి తెలిసిందే. నాగచైతన్య- సమంత లు విడాకులు తీసుకునేందుకు కేటీఆర్ కారణమని సురేఖ వ్యాఖ్యానించడం పెను దుమారం రేపింది. సమంతపై సురేఖ చేసిన వ్యాఖ్యలపై దుమారం రేగడంతో వాటిని సురేఖ బేషరతుగా వెనక్కి తీసుకున్నారు. కానీ, సమంతపై వ్యాఖ్యలు వెనక్కి తీసుకొని గంటలు గడవక ముందే తాజాగా మరోసారి సమంత విడాకులపై సురేఖ సంచలన వ్యాఖ్యలు చేశారు.
సమంత విషయంలో తాను చేసిన వ్యాఖ్యలు తప్పంటూనే సురేఖ మరోసారి సమంత పరువుకు భంగం కలిగించేలా సంచలన వ్యాఖ్యలు చేశారు. సమంత, నాగ చైతన్య విడాకులు ఎందుకు తీసుకున్నారో ఎవరికీ తెలీదని, బయటి ప్రపంచానికి నిజాలు ఏంటో తెలీదని అన్నారు. విడాకుల గురించి నాగార్జున ఫ్యామిలీ నుంచి కూడా ఎవరూ ఏమీ చెప్పలేదని అన్నారు. అయితే, తనకు ఇండస్ట్రీ నుంచి ఇంటర్నల్ గా వచ్చిన సమాచారం ప్రకారమే తాను మాట్లాడానని, కేటీఆర్ పై విమర్శలు గుప్పించే క్రమంలో కోపం వచ్చి ఆ విషయం చెప్పాల్సి వచ్చిందని అన్నారు.
పదవీ కాంక్షతో కేసీఆర్‌ను కేటీఆర్ ఏదో చేశాడన్న ప్రచారం సాగుతోందని సురేఖ షాకింగ్ కామెంట్స్ చేశారు. బడ్జెట్ రోజు అసెంబ్లీకి వచ్చిన కేసీఆర్ మళ్లీ కనిపించలేదని చెప్పారు. ఎర్రవెల్లి ఫామ్ హౌస్‌లో కేసీఆర్ ఏం చేస్తున్నారో తెలియదని, గజ్వేల్ లో కేసీఆర్ కనిపించడం లేదని పోలీస్ స్టేషన్‌లో ఫిర్యాదు చేస్తామని అన్నారు. కేటీఆర్ సీఎంగా భావించి పిచ్చి పిచ్చి నిర్ణయాలు తీసుకోవడం వల్లే అసెంబ్లీ, లోక్ సభ ఎన్నికల్లో బీఆర్ఎస్ ఓడిపోయిందని విమర్శించారు. సోషల్ మీడియాను అడ్డుపెట్టుకొని కేటీఆర్ పిచ్చి పిచ్చి రాతలు రాయిస్తున్నారని, తనపై ట్రోలింగ్ చేసిన వారిని దుబాయ్ పంపించి కాపాడుతున్నారని ఆరోపించారు.
