బాబు ఈజ్ బ్యాక్…రా..కదలిరా

ఏపీలో ఎన్నికలకు మరో 3 నెలల గడువు మాత్రమే ఉన్న నేపథ్యంలో తమ ఉమ్మడి కార్యాచరణను ప్రజల్లోకి తీసుకెళ్లేందుకు రెండు పార్టీలు వడివడిగా అడుగులు వేస్తున్నాయి. ఈ క్రమంలోనే ‘రా..కదలి రా’ పేరుదో టీడీపీ అధినేత చంద్ర బాబు , జనసేనాని పవన్ కల్యాణ్ ఈ నెల 5 నుంచి ప్రజల్లోకి వెళ్లబోతున్నారు. ‘రా… కదలిరా’ పోస్టర్లలో టీడీపీ సైకిల్, జనసేన గ్లాసు గుర్తులు పక్కపక్కనే ముద్రించారు. పార్లమెంటు నియోజకవర్గాల వారీగా రోజుకు 2 చొప్పున మొత్తం 22 బహిరంగ సభల్లో చంద్రబాబు, పవన్ పాల్గొనబోతున్నారు. జనవరి 5వ తేదీన ఒంగోలు పార్లమెంట్ నియోజకవర్గంలో తొలి సభ నిర్వహించనున్నారు.

మంగళగిరి టీడీపీ ప్రధాన కార్యాలయంలో ఈ కార్యక్రమాల షెడ్యూల్ ను టీడీపీ ఏపీ అధ్యక్షుడు అచ్చెన్నాయుడు వెల్లడించారు. ప్రజా చైతన్యం కోసం రాబోయే 100 రోజుల్లో నిర్విరామంగా టీడీపీ-జనసేన సంయుక్తంగా కార్యక్రమాలు చేపట్టబోతున్నాయని అన్నారు. జగన్ దుర్మార్గపు పాలన ముగింపు దశకు చేరుకుందని అన్నారు. టీడీపీలో చేరికలకు సంబంధించి రెండు కమిటీలు వేశామని అన్నారు. టీడీపీలో చేరేందుకు వైసీపీ నేతలు చాలామంది సిద్ధంగా ఉన్నారని అన్నారు.

కానీ, తాము ఆచితూచి వ్యవహరిస్తున్నామని, కమిటీల అభిప్రాయాలు..చంద్రబాబు నిర్ణయమే అంతిమం అని చెప్పారు. వైసీపీ నేతలకే జగన్ పై విశ్వాసం లేదని విమర్శించారు. ఈ నెల 4న చంద్రబాబు చేతుల మీదుగా ‘జయహో బీసీ’ ప్రారంభిస్తామన్నారు. ఈ నెల 3వ తేదీన మంగళగిరిలోని పార్టీ జాతీయ కార్యాలయం సమీపంలోని కన్వెన్షన్ సెంటర్లో రాష్ట్ర పంచాయతీ రాజ్ విభాగం సమావేశం నిర్వహించబోతున్నారు.

పార్లమెంట్ నియోజకవర్గాల వారీగా బహిరంగ సభల వివరాలు

జనవరి 5: ఒంగోలు పార్లమెంట్ పరిధిలోని కనిగిరిలో సభ
జనవరి 6: విజయవాడ పార్లమెంట్ పరిధిలోని తిరువూరు, నరసాపురం పార్లమెంట్ పరిధిలోని ఆచంట.
జనవరి 9: తిరుపతి పార్లమెంట్ పరిధిలోని వెంకటగిరి, నంద్యాల పార్లమెంట్ పరిధిలోని ఆళ్లగడ్డ.
జనవరి 10: విజయనగరం పార్లమెంట్ పరిధిలోని బొబ్బిలిలో, కాకినాడ పార్లమెంట్ పరిధిలోని తుని.
జనవరి 18: ఎన్టీఆర్ వర్థంతి నాడు మచిలీపట్నం పార్లమెంట్ పరిధిలోని గుడివాడలో భారీ సభ
జనవరి 19: చిత్తూరు పార్లెమంట్ పరిధిలోని జీడీ నెల్లూరు, కడప పార్లమెంట్ పరిధిలోని కమలాపురం
జనవరి 20: అరకు పార్లమెంట్ పరిధిలోని అరకులో, అమలాపురం పార్లమెంట్ పరిధిలోని మండపేట.
జనవరి 24: రాజంపేట పార్లమెంట్ పరిధిలోని పీలేరు, అనంతపురం పార్లమెంట్ పరిధిలోని ఉరవకొండలో సభ
జనవరి 25: నెల్లూరు పార్లమెంట్ పరిధిలోని కొవ్వూరు, కర్నూలు పార్లమెంట్ పరిధిలోని పత్తికొండ అసెంబ్లీలో.
జనవరి 27: రాజమహేంద్రవరం పార్లమెంట్ పరిధిలోని గోపాలపురం, గుంటూరు పార్లమెంట్ లోని పొన్నూరు అసెంబ్లీలో.
జనవరి 28: అనకాపల్లి పార్లమెంట్ పరిధిలోని మాడుగుల, శ్రీకాకుళం పార్లమెంట్ పరిధిలోని టెక్కలిలో..
జనవరి 29: ఏలూరు పార్లమెంట్ పరిధిలోని ఉంగుటూరు, బాపట్ల పార్లమెంటు స్థానం పరిధిలో చీరాల నియోజకవర్గంలో భారీ బహిరంగ సభలు